Indian-Origin Man Stabbed In London: ब्रिटनमध्ये गेल्या तीन दिवसांत दोन भारतीय नागरिकांची चाकूने भोसकून हत्या करण्यात आली आहे. शुक्रवारी झालेल्या ताज्या हल्ल्यात अरविंद शशिकुमार (३८) या भारतीय वंशाच्या व्यक्तीची चाकूने भोसकून हत्या करण्यात आली.

तर या घटनेच्या अवघ्या तीन दिवस आधी लंडनमध्ये शिकणाऱ्या हैदराबाद येथील २७ वर्षीय विद्यार्थिनीची चाकूने वार करून हत्या केल्याची घटना समोर आली होती. हल्लेखोराला पोलिसांनी अटक केली आहे.

पोलिसांनी दिलेल्या माहितीनुसार, अरविंद शशिकुमार असे मृताचे नाव आहे. जो मूळचा केरळचा होता. शुक्रवारी त्याचा रूममेट सलमान सलीम याने त्याच्या छातीवर वार करून त्याची हत्या केली.

विद्यार्थी व्हिसावर आल्यानंतर शशीकुमार गेल्या १० वर्षांपासून यूकेमध्ये राहत होता. पोलिसांनी दिलेल्या माहितीनुसार, २५ वर्षीय सलमान सलीमला हत्येच्या आरोपाखाली अटक करण्यात आली आहे.

हे दोघे साउथेम्प्टन वे, कॅम्बरवेल येथे एका घरात एकत्र राहत होते. पोलिसांनी दिलेल्या माहितीनुसार, दोघांमध्ये काही कारणावरून वाद झाला, त्यानंतर प्रकरण चिघळले आणि भांडण झाले.

त्यानंतर आरोपींनी अरविंद शशीकुमार याची चाकूने वार करून हत्या केली. ही घटना १६ जून रोजी घडल्याचे पोलिसांनी सांगितले. तर शुक्रवारी रात्री १.३१ वाजता अरविंद शशीकुमार यांचा जागीच मृत्यू झाला. पोस्टमॉर्टम रिपोर्टनुसार शशिकुमारचा मृत्यू छातीत वार झाल्यामुळे झाला.

पोलिसांनी सांगितले की, मृताच्या कुटुंबीयांना घटनेची माहिती देण्यात आली असून, गुन्हे शाखेच्या तज्ञांच्या मदतीने या प्रकरणाचा तपास करण्यात येत आहे.

विशेष म्हणजे याच्या काही दिवसांपूर्वी ब्रिटनमधून ‘मास्टर ऑफ सायन्स (एमएससी)’चे शिक्षण घेत असलेल्या हैदराबादच्या तेजस्विनी कोनथम (२७) हिची राहत्या घरी वार करून हत्या करण्यात आली होती.