जेरुसलेम : इस्रायलची राजधानी जेरुसलेमच्या (Israel Jerusalem) एका प्रार्थनास्थळावर शुक्रवारी गोळीबाराची घटना उघडकीस आली. या गोळीबारात आठ जणांचा मृत्यू झाला, तर 10 जण जखमी झाले.

पोलिसांनी या हल्ल्याला दहशतवादी हल्ला असल्याचं म्हटलंय. इस्रायल परराष्ट्र मंत्रालयाच्या हवाल्यानं रॉयटर्स या वृत्तसंस्थेनं ही माहिती दिलीये. हल्लेखोर जागीच ठार झाल्याचं पोलिसांनी सांगितलं.

इस्रायल पोलिसांनी (Israel Police) सांगितलं की, हा हल्ला पूर्व जेरुसलेममधील ज्यूंच्या शेजारच्या नेव्ह याकोव्हमध्ये झाला. हल्ल्यानंतर काही वेळातच पोलीस दल घटनास्थळी पोहोचलं आणि त्यांनी हल्लेखोरावर गोळ्या झाडल्या. मात्र, पोलिसांनी याबाबत कोणतीही माहिती दिलेली नाही. एपी या वृत्तसंस्थेनं ही माहिती दिलीये.

दरम्यान, वेस्ट बँकमध्ये इस्रायली लष्करी हल्ल्यात नऊ लोक मारले गेल्याच्या एका दिवसानंतर हा हल्ला झाला आहे. प्रार्थनास्थळावर झालेल्या गोळीबाराची जबाबदारी अद्याप कोणत्याही संघटनेनं स्वीकारलेली नाही. मात्र, इस्लामी अतिरेकी गट हमासनं जबाबदारी न स्वीकारता हल्ल्याचं कौतुक केलंय.