Pakistan coal Mine Accident:

पाकिस्तानातील बलुचिस्तानमध्ये एका शक्तिशाली स्फोटामुळे कोळशाची खाण कोसळून किमान १२ जणांचा मृत्यू झाला, तर आठ जणांना वाचवण्यात यश आले.

हरनई जिल्ह्यातील हरदालो भागात ही घटना घडल्याची माहिती समोर आली आहे. हा अपघात झाला तेव्हा खाणीत 20 मजूर काम करत होते.

बलुचिस्तानचे मुख्य खाण निरीक्षक असलेल्या अब्दुल गनी बलोच यांनी बुधवारी सकाळी बचावकार्य पूर्ण झाल्याचे सांगितले की, काल रात्री मिथेन वायूचा स्फोट झाला तेव्हा खाणीत 20 कामगार काम करत होते. बचाव पथकाला खाणीत 12 मृतदेह सापडले, तर जखमी झालेल्या आठ जणांना तातडीने रुग्णालयात नेण्यात आले.

बलोच म्हणाले की, या अपघातानंतर लगेचच रात्री दोन मृतदेह सापडले, तर बुधवारी पहाटे 10 मृतदेह सापडले. खाण महासंचालक अब्दुल्ला शाहवानी यांनीही मृतांच्या संख्येला दुजोरा दिला आहे.

दरम्यान, पंतप्रधान शहवाज शरीफ यांनी या घटनेवर शोक व्यक्त करत जखमींना शक्य ती सर्व मदत देण्याची घोषणा पंतप्रधानांनी केली.

पाकिस्तानच्या कोळसा उत्पादनात बलुचिस्तान प्रांताचा वाटा ५० टक्के आहे. तथापि, पाकिस्तानमध्ये गॅस निर्मितीमुळे होणारे अपघात सामान्य आहेत. सुरक्षा उपकरणांचा अभाव आणि कामाची खराब परिस्थिती ही वारंवार अपघातांची मुख्य कारणे असल्याची कामगारांची तक्रार आहे.

गेल्या वर्षी डिसेंबरमध्ये बलुचिस्तानमधील डुकी कोळसा क्षेत्रामध्ये एका खाजगी खाणीला लागलेल्या आगीत दोन कामगारांना आपला जीव गमवावा लागला होता आणि तीन जण जखमी झाले होते.

त्याचवेळी, सप्टेंबरमध्ये सिंधमधील जामशोरो येथे कोळसा खाण कोसळल्याने तीन मजूर ढिगाऱ्याखाली गाडले गेले होते. तर 2022 मध्ये, हरनाई जिल्ह्यात कोळसा खाणीत गॅस स्फोटात सहा खाण कामगार ठार झाले होते.