बोगोटा : कोलंबियामधील ॲमेझॉनच्या घनदाट जंगलात १७ दिवसांपूर्वी झालेल्या विमान दुर्घटनेतील बेपत्ता चार मुलांचा शोध लागला असून ती जिवंत असल्याची माहिती कोलंबियाचे अध्यक्ष गुस्तावो पेट्रो यांनी बुधावारी (ता.१७) दिली. ही घटना संपूर्ण देशासाठी आनंदाची असल्याचे त्यांनी सांगितले. या मुलांमध्ये अकरा महिन्याच्या एका बालकाचा समावेश आहे.

ॲमेझॉन येथील घनदाट जंगलामध्ये एक मे रोजी विमान कोसळल्याने झालेल्या अपघातामध्ये विमानचालकासह रोनोक मुकुटू या नावाची महिला आणि अन्य एका व्यक्तीचा मृत्यू झाला. रोनोकची चार मुले बेपत्ता झाली होती. या मुलांची वये १३ वर्षे, नऊ वर्षे चार वर्षे अशी आहेत त्यांच्यासमवेत एक अकरा महिन्यांचे बाळ देखील आहे. या मुलांची आई ॲमेझॉनमधील हुईटोटो या स्थानिक जमातीमधील होती.

विमान दुर्घटनेची माहिती प्रशासनाला मिळताच या बालकांचा शोध घेण्यासाठी कोलंबियाच्या सैन्यदलाचे सुमारे शंभर सैनिक, श्‍वान पथका सह येथील जंगलामध्ये ‘ऑपरेशन होप’ सुरू केले होते. जंगलातील ४० मीटर उंचीची महाकाय झाडे, वन्य श्‍वापदांचा संचार आणि मुसळधार पाऊस यामुळे शोधकार्यात अडथळा येत होता. या भागात जाण्यासाठी फारसे रस्ते नसल्याने नदीतून जाणे अवघड आहे. त्यामुळे विमान वाहतूक हाच एक पर्याय वापरला जातो. शोधकार्यासाठीही तीन हेलिकॉप्टरचीही मदत घेण्यात आली.

जंगलात आढळले खोपटे

या शोधमोहिमेत सैनिकांना विमान अपघातात मृत्युमुखी पडलेल्या तिघांचे मृतदेह मिळाले. या परिसरात झाडांच्या फांद्यांच्या साहाय्याने तात्पुरत्या स्वरूपात बांधलेले खोपटे, तसेच दुधाची बाटली, अर्धवट खाल्लेले फळ, एक कात्री आणि हेअरबँड आदी वस्तू आढळल्याने अपघातातील काही जण जिवंत असल्याचा आशा निर्माण झाली होती. त्यानंतर शोधमोहिमेने अधिक वेग घेतला आणि तब्बल दोन आठवड्यांनी या घनदाट जंगलात चार मुले जिवंत सापडली.

ही चार मुले जंगलाच्या नेमक्या कोणत्या भागात सापडली याची माहिती पेट्रो यांनी दिली नाही. तसेच इतके दिवस ही चार मुले कोणत्याही मदतीशिवाय जंगलात कशी काय राहू शकली याचा उलगडाही झालेला नाही. विमान पडल्यानंतर ही मुले दक्षिण काक्वेटा भागातील जंगलात फिरत होती. दरम्यान, मुलांच्या आजीने हुईटोटो भाषेत पाठविलेला ध्वनिमुद्रित संदेश मिळाला. त्यात जंगलात न फिरण्याची सूचना तिने केली होती.

वैशिष्ट्यपूर्ण हुईटोटो

ॲमेझॉनच्या जंगलातील हुईटोटो (‘विटोटो’ असेही लिहिले जाते) ही दूर जंगलात एकोप्याने राहणारी जमात आहे. शिकार करणे, मासेमारीतील कौशल्य आणि चिकाटी ही या जमातीची वैशिष्ट्ये आहेत. यामुळेच ही लहान मुले जंगलात एकटी राहिली व जगू शकली. शोषण, रोगराई आणि सामावून घेण्याच्या प्रक्रियेमुळे अनेक दशकांपासून या समाजाची लोकसंख्या झपाट्याने कमी झाली आहे.