काबूल : अफगाणिस्तानवर तालिबानने ताबा मिळवल्यानंतर देश सोडून जाणाऱ्यांची संख्या दिवसेंदिवस वाढतच आहे. मोठ्या संख्येने लोक आपापल्या देशात परतत आहेत. अमेरिका आणि नाटो सैनिकांनी देखील अफगाणिस्तान देश जवळपास सोडून दिला आहे. मात्र, अद्यापही तालिबानी सत्तेमुळे बाहेर पडण्यासाठी मोठ्या संख्येने अमेरिकन सैनिक काबूल एअरपोर्टवर उपस्थित आहेत. अमेरिकन सैनिकांनी काबूल एअरपोर्ट आपल्या ताब्यात घेतलं आहे.

या दरम्यानच तालिबानने अमेरिकेला एक इशारा दिला आहे. अफगाणिस्तानमधून सैन्य मागे घेण्याची ३१ ऑगस्टची मुदत टळून गेल्यास गंभीर परिणामांना सामोरे जावे लागेल, असा इशारा तालिबानने अमेरिकेला दिला आहे. अमेरिकेचे अध्यक्ष ज्यो बायडेन यांनी आधी जाहीर केलेली ३१ ऑगस्टची तारीख हीच तालिबानने अंतिम असल्याचे गृहीत धरले आहे. रविवारी बायडेन यांनी आपल्या प्रशासनाबरोबरील चर्चेची माहिती दिली. ही मुदत वाढविण्याची शक्यता त्यांनी बोलून दाखविली. अफगाणिस्तानमध्ये अडकलेल्या नागरिकांची सुटका करण्याच्या मोहिमा काबूल विमानतळावरून पार पडणे सुकर व्हावे हा त्यांचा उद्देश आहे.

या पार्श्वभूमीवर तालिबानकडून हा इशारा देण्यात आला. अमेरिकेशी झालेल्या करारानुसार ३१ ऑगस्टपूर्वी नवे सरकार स्थापन करण्याबाबत तालिबानला कोणतीही घोषणा करता येणार नाही. त्यामुळे अमेरिका आणि मित्र देशांचे सैन्य लवकरात लवकर परतावे यासाठी तालिबान दडपण आणत आहे.

ब्रिटनकडून मागणीची शक्यता

जी७ समूहातील देशांची तातडीची बैठक मंगळवारी होणार आहे. त्यावेळी ब्रिटनकडूनही सैन्यमाघारीची मुदत वाढविण्याबाबत मागणी होण्याची शक्यता आहे. ब्रिटनचे पंतप्रधान बोरीस जॉन्सन तसे आवाहन करण्याची शक्यता आहे.