Intel announces massive layoffs: संगणकामधील चिप बनवणाऱ्या जगातील सर्वात मोठ्या कंपन्यांपैकी एक असणारी, अमेरिकेची इंटेल ही कंपनी कठीण काळातून जात आहे. अशातच कंपनीत काही मोठे बदलही झाल्याचे पाहायला मिळाले आहेत. लिप-बू-टॅन यांना नवीन सीईओ बनवलं गेलं आहे. अपेक्षा आहे की, काहीतरी चमत्कार घडेल कंपनी पुन्हा सुरळीत चालेल.

असे असतानाच आता नवीन इंटेलचे नवीन सीईओ लिप-बू-टॅन यांनी काही कठोर निर्णय घेतले आहेत. त्यापैकी सर्वात मोठा म्हणजे कंपनीने अशी घोषणा केली आहे की, यावर्षी किमान २४ हजार कर्माचाऱ्यांना कामावरून काढण्यात येईल. ही संख्या २०२४ च्या अखेरपर्यंतच्या एकूण कर्मचारी संख्येच्या एक चतुर्थांश इतकी आहे. ही बातमी इंटेलच्या दुसऱ्या तिमाहीच्या २०२५ च्या कमाईच्या अहवालादरम्यान आली आहे.

इंटेल आता स्वतःला लहान आणि अधिक कार्यक्षम बनवण्यावर लक्ष केंद्रित करेल. या धोरणाअंतर्गत आता, कंपनीने जर्मनी आणि पोलंडमधील त्यांचे मोठे प्रोजेक्ट रद्द केले आहेत. तसेच कंपनी कोस्टा रिकामधील काही कामकाज बंद करून व्हिएतनामला हस्तांतरित करत आहे. या निर्णयामुळे कोस्टा रिकामधील सुमारे २००० कर्मचाऱ्यांची नोकरी जाण्याची शक्यता आहे. द व्हर्जच्या रिपोर्टमधून ही माहिती समोर आली आहे.

कंपनीचे नवीन सीईओ लिप-बू टॅन यांनी मान्य केले आहे की, इंटेलने चिप्सच्या मागणीचा योग्य अंदाज न घेता नवीन प्रोजेक्ट्स उभारण्यात खूप पैसे खर्च केले आहेत. तसेच टॅन यांनी गुंतवणूकदारांशी झालेल्या संभाषणात म्हटले आहे की, "मी गोष्टी बांधण्यात आणि ग्राहक येण्याची अपेक्षा करण्यावर विश्वास ठेवत नाही. आता आम्ही लोकांना खरोखर जे हवे आहे ते बनवू".

या मोठ्या बदलात कंपनीला खूप खर्च करावा लागत आहे. नोकऱ्या काढून टाकण्यासाठी आणि पुनर्रचनेसाठी सुमारे 2 अब्ज डॉलर खर्च येईल आणि कंपनी अजूनही तोट्यात आहे. इंटेलने तिमाहीत 12.9 अब्ज डॉलर उत्पन्नासह 2.9 अब्ज डॉलर गमावले. तथापि, इंटेलचे काही युनिट्स चांगले काम करत आहेत. सर्व्हर आणि क्लाउड सर्विसला बळकटी  देणारे त्यांचे डेटा सेंटर युनिट वाढले आहे. परंतु नियमित संगणकांसाठी बनवलेल्या चिप्स पूर्वीइतक्या विकल्या जात नाहीत.