जगातल्या प्रत्येक व्यक्तीला स्वतःचं घर असावं, असं वाटत असतं. पण, सध्याच्या महागाईच्या युगात घर खरेदी करणं किंवा बांधणं हे फार कठीण काम आहे. मध्यमवर्गीय माणसाची आजीवन कमाई घर खरेदीकडे जाते. हे सर्व असूनही स्वतःचं घर असणं, हे प्रत्येकाचं स्वप्न असतं. पण, तुम्हाला एवढं स्वस्त घर मिळत आहे, त्याबद्दल जाणून घेतल्यावर तुमचा विश्वास बसणार नाही.

जर तुम्हाला समजलं, की फक्त 100 रुपयांमध्ये घर मिळत आहे, तर तुम्ही त्यावर विश्वास ठेवाल का? नाही ना! पण, हे पूर्णपणे सत्य आहे. परंतु, एवढं स्वस्त घर भारतात उपलब्ध नाही. हे घर अब्रुझो राज्यातील प्रटोला पेलिग्ना (Pratola Peligna) नावाच्या ठिकाणी आहे. येथे लोकांना राहण्यासाठी फक्त 100 रुपयांत घर मिळत आहे. इथल्या सरकारनं एक योजना सुरू केलीय, ज्या अंतर्गत लोकांना स्वस्त घरं दिली जाताहेत.

सरकारची ही योजना काही दिवसांपूर्वीच प्रटोला पेलिग्ना येथे सुरू करण्यात आली. ज्या लोकांना घरांची गरज आहे, त्यांच्याकडून अर्ज मागवले जात आहेत. सरकारला इथं 250 घरं विकायची आहेत. परंतु, खरेदीदाराला त्याची दुरुस्ती करावी लागेल, ज्यासाठी बरेच पैसे खर्चही होऊ शकतात. तुम्ही हे घर शंभर रुपयांना खरेदी करू शकता, पण ते दुरुस्त करण्यासाठी तुमच्याकडे पैसे असायला हवेत. प्रटोला पेलिग्ना प्राधिकरणाच्या मते, जर सहा महिन्यांत घराची दुरुस्ती झाली नाही, तर घराच्या मालकाला सुमारे 9 लाख रुपये दंड भरावा लागेल.

स्की रिसॉर्ट (Ski resort) लगतचं ही घर बांधण्यात आलीयत. याशिवाय, येथून रोम देखील काही अंतरावरचं आहे. यापूर्वीही, अनेक वेळा एक युरोसाठी घर विकण्याची योजना इटालियन अधिकाऱ्यांनी आणली होती. या घरांचा लिलाव करुन एक युरोपासून या घरांची खरेदी सुरू होईल. घराच्या मालकांना ते तीन वर्षांत राहण्यायोग्य बनवावं लागेल. मात्र, जर कोणी इटलीबाहेर राहत असेल आणि त्यांना घर खरेदी करायचं असेल, तर 2 लाख 62 हजार रुपये शुल्क भरावे लागेल. याआधीही इथल्या सरकारनं आणखी अनेक शहरांमध्ये स्वस्त घरांची योजना लागू केली होती.