क्वाललांपूर - मलेशियाने शुक्रवारी पाकिस्तान इंटरनॅशनल एअरलाइन्सच्या बोईंग 777 या प्रवासी विमानाला क्वाललांपूर विमानतळावर जप्त केलं. PIA चे विमान लीजवर देण्यात आले होते आणि त्याची रक्कम देण्यात आली नव्हती. मलेशियाच्या स्थानिक न्यायालयाच्या आदेशानुसार हे विमान जप्त करण्यात आलं आहे. मलेशियाने उचललेलं हे पाऊल आपल्याला मान्य नसल्याचं PIA ने म्हटलं आहे. 

पाकिस्तान इंटरनॅशनल एअरलाइन्सने 2015 मध्ये एका व्हिएतनामच्या कंपनीकडून बोइंग 777 सह दोन एअरक्राफ्ट भाड्याने घेतले होते. जप्त करण्यात आलेल्या विमानामध्ये प्रवाशीसुद्धा होते. त्यात स्टाफमधील 18 जणांचा समावेश आहे. आता विमान जप्त झाल्यानं प्रवासी क्वाललांपूर इथं अडकले आहे. प्रोटोकॉलनुसार सर्वांना 14 दिवस क्वारंटाइन करण्यात येईल.

हे वाचा - एक कबूतर देशासाठी ठरतंय धोक्याचं; ऑस्ट्रेलिया सरकार ठार मारणार?

पाकिस्तान इंटरनॅशनल एअरलाइन्सने याबाबत ट्विट केलं आहे. त्यात म्हटलं की, पीआयए आणि थर्ड पार्टी यांच्यातील कायदेशीर लढाईमध्ये झालेला हा निर्णय एकतर्फी आहे. सर्व प्रवशांची आम्ही काळजी घेत आहोत. अडकून पडलेल्या प्रवाशांना पर्यायी व्यवस्था उपलब्ध करून दिली जाईल. 

हे वाचा - जपानमध्ये धर्मांतराची लाट? 10 वर्षांत मुस्लीम लोकसंख्येचा आकडा झाला दुप्पट!

PIA 4 अब्ज डॉलर्स तोट्यात असून कोरोनाच्या काळात उड्डाणांवर बंदी असल्यानं अडचणी वाढल्या होत्या. मे महिन्यात जेव्हा विमाने सुरु झाली त्याचवेळी एक दुर्घटना झाली होती. त्यात 97 प्रवाशांचा मृत्यूही जाला होता. त्यावेळी पाकिस्तानच्या मंत्र्यांनी म्हटलं होतं की, देशात तीनपैकी एक पायलट खोटा आहे. त्यांच्याकडे बनावट लायसन आहे असाही खळबळजनक दावा केला होता. मंत्र्यांच्या या दाव्यानंतर अनेक देशांनी PIA च्या विमानांवर बंदी घातली.