मिस युनिव्हर्स स्पर्धेनं एक ऐतिहासिक निर्णय घेतलेला आहे. मिस युनिव्हर्सच्या स्पर्धेत आता विवाहित महिला आणि मातांनाही सहभागी होता येणार आहेत. या स्पर्धेसाठीच्या निकषांमध्ये होणाऱ्या या बदलांचं सध्या कौतुक होत आहे. (Miss Universe beauty pageant new rules)

मिस युनिव्हर्स या जगातल्या सर्वोच्च स्पर्धांपैकी एक असलेल्या स्पर्धेचे निकष आता बदलण्यात आले आहेत. तुमचं लग्न झालंय की नाही, तुम्हाला मुलं आहेत की नाहीत, याचा आता या स्पर्धेशी काहीही संबंध नाही. २०२३ सालच्या स्पर्धेपासून या नियमांची अंमलबजावणी केली जाणार आहे.

मिस युनिव्हर्स स्पर्धेत सहभागी होणाऱ्या महिला या अविवाहित असाव्यात, असाच निकष कायम लावला जात आला आहे. विशेषतः मातांना तर कायमच वगळण्यात आलं होतं. शिवाय मिस युनिव्हर्स झालेल्या महिलांना आपल्या कार्यकाळात गरोदरपणा टाळावा लागत होता. २०२० सालची मिस युनिव्हर्स ठरलेली मेक्सिकोची अँड्री मेझा हिने या नव्या नियमांचं कौतुक केलं आहे. सध्याचे नियम खूपच लिंगभेद करणारे आणि अतार्किक असल्याचं मत तिने व्यक्त केलं आहे.