लाहोर : पाकिस्तानचा माजी खेळाडू मोहम्मद हाफिज (Mohammad Hafeez) पाकिस्तान क्रिकेट बोर्डावर आपल्या टीकात्मक वक्तव्यांसाठी प्रसिद्ध आहे. त्याने अनेकवेळा पाकिस्तान क्रिकेट बोर्डावर टीका केली आहे. मात्र आज त्याने राजकीय निर्णयांमुळे पाकिस्तानमधील सामन्य जनता कशी होरपळून निघत आहे याचा पाढा वाचत पाकिस्तान सरकारवर (Pakistan Government) टीका केली.

मोहम्मद हाफिजने ट्विट केले की, 'लाहोरमध्ये पेट्रोल पंपावर पेट्रोल नाही? एटीएम मशिनमध्ये कॅश नाही? राजकीय निर्णयांसाठी सामन्य जनता होरपळून निघत आहे.' या कॅप्शनचे ट्विट त्याने माजी पंतप्रधान इमरान खान (Imran Khan) आणि सध्याचे पंतप्रधान शाहबाज शरिफ यांना टॅग केले आहे. शाहबाज शरिफ (Shehbaz Sharif) यांनी एप्रिल महिन्यात पाकिस्तानचे 23 वे पंतप्रधान म्हणून शपथ ग्रहण केली आहे. त्यांनी इमरान खान यांच्या सरकारने विश्वास मत गमावल्यानंतर सत्तास्थापनेचा दावा केला होता.

पाकिस्तानचा माजी अष्टपैलू खेळाडू मोहम्मद हाफिजने तीनही क्रिकेट प्रकारात पाकिस्तानचे प्रतिनिधित्व केले आहे. तो पाकिस्तानने 2017 ची आयसीसी चॅम्पियन्स ट्रॉफी जिंकलेल्या संघात देखील त्याचा समावेश होता. हाफिजने 12 हजारपेक्षा जास्त आंतरराष्ट्रीय धावा केल्या आहेत. याचबरोबर 250 विकेट्स देखील घेतल्या आहे. तसेच तो पाकिस्तानचा काही काळ कर्णधार देखील होता.