जगभरात सध्या कोरोना (Corona) आणि ओमिक्रॉन (Omicron) रुग्णांची वाढ होत आहे. मात्र त्यातच आता दिलासादायक माहिती देखील समोर आली आहे. ओमिक्रॉन व्हेरीअंटचा प्रसार कोविड महामारीला सामान्य आजाराचं रुप देतोय असा अंदाज वर्तवला जातो आहे. युरोपियन युनियनच्या (EU) औषध नियामकाने मंगळवारी सांगितलं की, ओमिक्रॉन स्ट्रेनचा प्रसार कोविडला एका सामान्य आजारासारखं रुप येतंय. ही सध्या एक महामारी असली तरी यामुळे मानवजातीला आता फार धोका राहीलेला नाही.

युरोपियन मेडिसिन एजन्सी (EMA) ने सामान्य लोकांसाठी चौथी लस सादर करण्याबद्दल साशंकता व्यक्त केली आहे. EMA ने म्हटलंय की, बूस्टर देणं हा शाश्वत पर्याय असू शकत नाही. "कोविडच्या संकटाचा शेवटी कधी असेल हे कोणालाच माहिती नाही, मात्र नक्कीच याचा शेवट होईल." युरोपियन मेडिसिन एजन्सीमधील लसीकरण धोरणाचे प्रमुख मार्को कॅवलेरी यांनी हे मत व्यक्त केलंय.

"सर्वसामान्य लोकांची प्रतिकारशक्ती वाढेल आणि ओमिक्रॉनमुळे भरपूर नैसर्गिक प्रतिकारशक्ती मिळेल. त्यामुळे आज महामारी असलेला कोरोनाचा संसर्ग येणाऱ्या काळात सामान्य आजार होईल." असंही ते पुढे म्हणाले.