पाकिस्तानच्या (Pakistan) पंजाब प्रांतात एका दुकानातून चोरीचा आरोप करत पुरुषांच्या एका गटानं एका किशोरवयीन मुलीसह चार महिलांना विवस्त्र केलं आणि त्यांना रस्त्यावर ओढत नेलं. लाहोरपासून 180 किमी अंतरावर असलेल्या फैसलाबादमध्ये (Faisalabad) सोमवारी ही घटना घडलीय. सोशल मीडियातून समोर आलेल्या एका व्हिडिओमध्ये एका किशोरवयीन मुलीसह चार महिला आपल्या आजूबाजूच्या लोकांना त्यांचं शरीर झाकण्यासाठी विनंती करताना दिसताहेत, परंतु त्यांना लाठ्यांनं मारहाण करण्यात आली.

व्हायरल व्हिडिओत या स्त्रिया रडताना दिसत असून लोकांना आम्हाला सोडून द्या, अशी विनंती करताना दिसताहेत; पण कोणीही त्यांच्या मदतीला धावून आलं नाही. तासभर रस्त्यावर त्या नग्नावस्थेत होत्या. या घटनेचा व्हिडिओ सोशल मीडियावर व्हायरल झाल्यानंतर पंजाब पोलिसांनी कारवाई केलीय. पंजाब पोलिसांच्या प्रवक्त्यानं मंगळवारी एका ट्विटमध्ये सांगितलं, की आम्ही या दुर्दैवी घटनेसंदर्भात पाच जणांना अटक केलीय. कायद्यातील संबंधित तरतुदींनुसार पाच संशयित आणि इतर अनेकांविरुद्ध एफआयआर नोंदवण्यात आलाय. या प्रकरणी पीडितांनी सांगितलं, की त्या फैसलाबाद येथील बावा चक मार्केटमध्ये कचरा वेचण्यासाठी गेल्या होत्या.

तक्रारीत महिलांनी म्हटलं की, आम्हाला तहान लागली म्हणून आम्ही उस्मान इलेक्ट्रिक स्टोअरमध्ये जाऊन पाण्याची बाटली मागितली. मात्र, त्याचा मालक सद्दाम यानं आमच्यावर चोरीच्या उद्देशानं दुकानात प्रवेश केल्याचा आरोप केला. सद्दाम व इतरांनी आम्हाला मारहाण करण्यास सुरुवात केली. त्यानंतर त्यांनी आम्हाला ओढून नेऊन रस्त्यावर विवस्त्र केलं आणि मारहाण केली. कपडे उतरवल्यानंतर त्यांनी आमचा व्हिडिओही बनवला. मात्र, हा अत्याचार थांबवण्यासाठी जमावातील कोणीही गुन्हेगारांना रोखण्याचा प्रयत्न केला नाही, असं त्यांनी स्पष्ट केलं.