संशोधक म्हणतात, 'कोरोना व्हायरस हा नैसर्गिकच!'
वॉशिंग्टन : कोरोनाचा विषाणू प्रयोगशाळेत जेनेटिक इंजिनिअरिंगच्या माध्यमातून तयार केला असल्याच्या काही देशांच्या आरोपांचे संशोधकांनी खंडन केले आहे. या विषाणूचा उगम निसर्गातच असल्याचा दावा त्यांनी केला असून, त्याबाबतची माहिती ‘नेचर मेडिसिन’ या नियतकालिकामध्ये प्रसिद्ध करण्यात आली आहे.
येथील स्क्रिप्स संशोधन संस्थेतील संशोधकांनी याबाबत अभ्यास केला आहे. गेल्या वर्षी चीनमधील वुहान शहारातून सर्वत्र पसरलेला ‘कोविड-१९’ हा विषाणू प्रयोगशाळेतून नव्हे, तर निसर्गचक्रातून बाहेर पडला असल्याचे या संशोधकांनी म्हटले आहे. हा विषाणू प्रयोगशाळेत तयार केला गेल्याचे कोणतेही पुरावे नसल्याचे त्यांनी म्हटले आहे.
‘कोरोना विषाणूच्या विविध प्रकारांच्या उपलब्ध गुणसूत्रांचा अभ्यास केला असता, तो निसर्गनिर्मितच असल्याचे दिसून येत आहे, असे संशोधन संस्थेतील प्रा. क्रिस्टीअन अँडरसन यांनी सांगितले. कोरोना व्हायरसचा पहिला रुग्ण २००३ मध्ये चीनमध्ये आढळला होता. यामुळे चीनमध्ये ‘सार्स’ची साथ पसरली होती. या विषाणूमुळे दुसरी साथ २०१२ मध्ये सौदी अरेबियात आली होती.
गेल्या वर्षी डिसेंबरमध्ये वुहानमधून कोरोनाचा सर्वत्र प्रसार झाल्यानंतर संशोधकांनी यावर अभ्यास सुरू केला. पूर्वीपेक्षा यंदा या विषाणू वेगाने पसरण्याचे कारण म्हणजे संसर्गग्रस्त लोकांचा इतर लोकांशी वाढलेला संपर्क हे आहे, असे संशोधकांनी सांगितले.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.