Russia-Ukraine War: पंजाब आणि हरियाणातील या तरूणांनी भारत सरकारकडे मदतीचे आवाहन केले आहे. त्यांची फसवणूक केली जात आहे आणि रशिया-युक्रेन युद्ध लढण्यास भाग पाडले जात असल्याचा त्यांचा दावा आहे. त्यांनी सोशल मिडीया X वर 105 सेकंदाचा व्हिडिओही शेअर केला आहे. या व्हिडिओमध्ये लष्कराचे कपडे घातलेली सात मुले बंद खोलीत दिसत आहेत. यातील गर्श नावाचा मुलगा हरियाणातील कर्नाल येथील रहिवासी आहे. तो एक व्हिडिओ रेकॉर्ड करत आहे आणि त्याच्या परिस्थितीचे वर्णन करत आहे. त्याने भारत सरकारकडे मदतीची याचना केली आहे.

रशिया-युक्रेन युद्धात 7 भारतीय मुले अडकली

एनडीटीव्हीने दिलेल्या माहितीनुसार, ही सर्व मुले 27 डिसेंबर रोजी नवीन वर्ष साजरे करण्यासाठी रशियाला गेली होती.त्यांच्याकडे रशियाला जाण्यासाठी 90 दिवसांचा वैध व्हिसा होता. त्यानंतर एजंट त्यांना बेलारूसला घेऊन गेला. बेलारूसला जाण्यासाठी व्हिसा लागेल हे माहीत नव्हते, असे या मुलांचे म्हणणे आहे. व्हिसाशिवाय ते बेलारूसला पोहोचताच एजंटने त्याच्याकडून पैसे घेतले आणि त्यांना तिथेच सोडले. यानंतर पोलिसांनी त्याला पकडून अधिकाऱ्यांच्या ताब्यात दिले. हा व्हिडीओ बनवणाऱ्या हर्षने दावा केला की, त्याला कागदपत्रांवर सही करण्यासाठी करण्यास भाग पाडले. त्यानंतर रशिया त्यांना युक्रेनविरुद्ध युद्ध करण्यास भाग पाडत आहे.

कामाच्या शोधात रशियाला गेला

हर्षच्या कुटुंबीयांनी एनडीटीव्हीला सांगितले की, त्यांचा मुलगा रोजगाराच्या शोधात परदेशात गेला होता आणि रशियामार्गे गेल्यास त्याला त्याच्या आवडीच्या देशात राहणे सोपे जाईल असे त्याला सांगण्यात आले. हर्षच्या आईने सांगितले की, "आमचा मुलगा 23 डिसेंबर रोजी कामाच्या शोधात परदेशात गेला होता आणि त्याला रशियात पकडण्यात आले आणि त्याचा पासपोर्ट काढून घेण्यात आला. त्याने आम्हाला सांगितले की त्याला रशियन सैनिकांनी पकडले होते, ज्यांनी त्याला 10 वर्षांच्या तुरुंगवासाची धमकी दिली होती आणि त्याला सैन्यात भरती केले. हर्षला लष्करी प्रशिक्षण घेण्यास भाग पाडले." आता हर्षची आई आपल्या मुलाला सुखरूप परत आणण्यासाठी भारत सरकारकडे विनंती करत आहे.

हर्षच्या भावाचा दावा आहे की, त्याला शस्त्रास्त्रांचे प्रशिक्षण देण्यात आले आणि डोनेस्तक परिसरात तैनात करण्यात आले. ते म्हणाले, "तो जिवंत असेल की नाही, हे आताच सांगणे कठीण आहे. भावाला देशात परत आणण्याचे आवाहनही त्यांनी सरकारला केले. व्हिडिओमध्ये दिसणाऱ्या दुसऱ्या व्यक्तीचे नाव गुरप्रीत सिंग असल्याचे सांगण्यात येत असून, त्याच्या कुटुंबीयांनीही सरकारकडे मदतीचे आवाहन केले आहे".

रशियन सैन्यात सक्तीची भरती

गुरप्रीत सिंगचा भाऊ अमृत सिंग याने सांगितले की, त्यांना सैन्यात भरती होण्यास भाग पाडले गेले. त्याने दावा केला, "बेलारूसमध्ये त्याने ज्या कागदपत्रांवर स्वाक्षरी केली ते रशियन भाषेत होते, त्यानंतर त्याला जबरदस्तीने तेथे सैन्यात भरती करण्यात आले. त्याला एकतर 10 वर्षांची शिक्षा भोगावी किंवा रशियन सैन्यात सामील होण्यास सांगण्यात आले".

राजकीय आणि आर्थिक पाठबळासाठी रशियावर अवलंबून असलेला बेलारूस हा रशियाचा सर्वात जवळचा मित्र देश मानला जातो. क्रेमलिनने युक्रेनवर आक्रमण करण्यासाठी आपला प्रदेश एक स्टेजिंग ग्राउंड म्हणून वापरला. तेव्हापासून, वारंवार संयुक्त लष्करी सरावामुळे चिंता वाढली आहे.

"रशियामध्ये अडकलेल्या भारतीयांना परत आणण्याचे प्रयत्न"

व्हिडिओमध्ये दिसणारी सात मुले रशियामध्ये अडकलेल्या लोकांपैकी आहेत. त्यांचे म्हणणे आहे की, त्यांना फसवणूक सैन्यात सामील करण्यात आले होते. गेल्या आठवड्यात, परराष्ट्र मंत्रालयाने सांगितले की ते जम्मू आणि काश्मीरमधील 31 वर्षीय आझाद युसूफ कुमारसह इतर अडकलेल्या लोकांच्या संपर्कात आहेत. त्याच्या "भरती" नंतर काही दिवसांनी, युसूफ कुमारला लढाईच्या परिस्थितीत पायात गोळी लागल्याचा आरोप आहे.

असेही वृत्त आहे की, कर्नाटक, तेलंगणा आणि उत्तर प्रदेशातील सुमारे 10 लोक अशाच गंभीर परिस्थितीत असल्याचे सांगत आहेत. त्यांना सुरक्षा रक्षक किंवा मजूर असल्याच्या बहाण्याने रशियाला पाठवण्यात आले; फसवणूक करणाऱ्या एजंटने त्यांच्याकडून प्रत्येकी तीन लाख रुपये घेतले.

युक्रेन-रशिया युद्धात काही भारतीय अडकल्याची माहिती मिळाल्याचे सरकारने गेल्या महिन्यात म्हटले होते. मॉस्कोमधून त्याच्या सुटकेसाठी सरकार वाटाघाटी करत आहे.