वॉशिंग्टन- अमेरिकेतील दक्षिण कॅलिफोर्नियातील ऑफिस कॉम्प्लेक्समध्ये बुधवारी झालेल्या गोळीबारात एका मुलासह चार जणांचा मृत्यू झाला आहे. त्याचबरोबर एक पोलिस कर्मचारीही या घटनेत जखमी झाला आहे. दरम्यान, लोकांवर अंधाधुंद गोळीबार करणाऱ्या व्यक्तीला पकडण्यात पोलिसांना यश आले आहे. पोलिसांच्या गोळीबारात हल्लेखोरही जखमी झाला आहे. त्याला उपचारासाठी रुग्णालयात दाखल करण्यात आले आहे. लेफ्टनंट जेनिफर अमत यांनी दिलेल्या माहितीनुसार, गोळीबाराची ही घटना कॉम्प्लेक्सच्या दुसऱ्या मजल्यावर घडली. 

'लॉस एंजिल्स टाइम्स'च्या वृत्तानुसार, हा गोळीबार बुधवारी सायंकाळी ऑरेंज ऑफिस कॉम्प्लेक्समध्ये झाला. यामध्ये एका मुलासह चार जण ठार झाले. तर पाचवी व्यक्ती जखमी झाली आहे. अद्याप या हल्ल्यामागचे कारण समजू शकलेले नाही. ज्या ठिकाणी गोळीबार झाला. तिथे छोटी-छोटी कार्यालये आहेत. स्थानिक वेळेनुसार सायंकाळी 5.30 वाजता गोळीबाराची माहिती मिळाली. सायंकाळी 7 च्या सुमारास पोलिसांना परिस्थितीवर नियंत्रण मिळवता आले.

हेही वाचा- फ्रान्सच्या 96 टक्के शाळांमध्ये कंडोम व्हेंडिंग मशीन; कारण माहितीय का?

कॅलिफोर्नियातील ऑरेंजमध्ये डिसेंबर 1997 नंतर पहिल्यांदा गोळीबार झाला. त्यावेळी झालेल्या गोळीबाराच्या घटनेत चार जणांना जीव गमवावा लागला होता. हे शहर लॉस एंजिल्सपासून सुमारे 48 किमी अंतरावर आहे. अमेरिकेत मागील दोन आठवड्यातील ही तिसरी घटना आहे. यापूर्वी अटलांटा स्पामध्येही गोळीबार झाला होता. यामध्ये आशियाई वंशाच्या 6 महिलांसमवेत 8 जणांचा जीव गेला होता. तर कोलोराडोतील एका सुपरमार्केटमध्ये झालेल्या गोळीबारात 10 जण ठार झाले होते. 

दरम्यान, अमेरिकेत गोळीबार होण्याची ही पहिली घटना नाही. यापूर्वी अनेकवेळा हल्ले झाले आहेत. यामध्ये शेकडो जणांचा मृत्यू झाला आहे. मिळालेल्या माहितीनुसार, आतापर्यंत अशा पद्धतीच्या गोळीबाराच्या घटनेत 447 जणांना जीव गमवावा लागला आहे. त्याचबरोबर 325 जण जखमी झालेले आहेत. या महिन्यात आतापर्यंत अमेरिकेत गोळीबाराच्या लहान-मोठ्या स्वरुपाच्या  सुमारे 47 घटना घडल्या आहेत. यामध्ये सुमारे 46 जणांना आपला जीव गमवावा लागला आहे.  india india 

हेही वाचा- फ्रान्समध्ये तीन आठवड्यांचा पुन्हा लॉकडाऊन; तिसऱ्या लाटेचा हाहाकार