जपान, सिंगापूर आणि दक्षिण कोरियाचा पासपोर्ट हा सगळ्यात शक्तिशाली पासपोर्टच्या क्रमवारीत आघाडीवर आहे. जग आता कोरोना महामारीच्या परिस्थितीमधून हळूहळू वर येत आहे. त्यामुळेच युरोपीय राष्ट्रांचे वर्चस्व असलेल्या महामारीपूर्वीच्या या क्रमवारीत आता बदल झाल्याचं दिसून आलं आहे. (Most Powerful passport in 2022)

जपान (Japan), सिंगापूर (Singapore) आणि दक्षिण कोरियाच्या (South Korea) पासपोर्टला जवळपास १९३ देशांमध्ये कोणत्याही कटकटींशिवाय प्रवेश आहे. हेनली अँड पार्टनर्स या पासपोर्ट क्रमवारी ठरवणाऱ्या कंपनीने ही माहिती दिली आहे. साल २०२२ साठी ही यादी जारी करण्यात आली आहे.

या क्रमवारीत रशियाचा ५० वा क्रमांक लागतो. रशियन पासपोर्टला ११९ देशांमध्ये कोणत्याही अडचणींशिवाय प्रवेश मिळतो. चीनचा क्रमांक ६९ वा असून ८० देशांत प्रवेश आहे, तर भारताचा ८७ वा क्रमांक लागतो. अफगाणिस्तानचा क्रमांक सर्वात खालचा आहे. त्या पासपोर्टवर केवळ २७ देशांमध्ये प्रवेश मिळू शकतो.