बर्न : बंदुकीतून सुटलेली गोळी कोणाचाही जीव घेऊ शकते. हे शस्त्र जितकं महाग, तितकंच धोकादायक देखील आहे. जगात बंदुकीच्या किंमती ह्या लाखात पहायला मिळतात. आता जगातील सर्वात छोटी बंदूक नुकतीच समोर आलीय. 'स्विस मिनी गन' (Swiss Mini Gun) या नावानं ओळखली जाणारी ही बंदूक जगातील सर्वात छोटी बंदूक असल्याची नोंद गिनीज बुक ऑफ वर्ल्ड रेकॉर्डमध्ये करण्यात आलीय.

स्विस मिनी गन (C1ST) ही जगातील सर्वात छोटी बंदूक आहे. ही बंदूक 5.5 सेंटीमीटर लांब, 3.5 सेंटीमीटर रुंद आणि 1 सेंटीमीटर जाडीची असून बंदुकीचं वजन फक्त 19.8 ग्रॅम आहे. ही बंदूक तुमच्या तळहाताच्या एका कोपऱ्यात मावेल एवढी छोटी आहे. परंतु, या बंदुकीची किंमत फारच मोठी आहे. अशी एक बंदूक घेण्यासाठी तुम्हाला 5 लाख रुपये मोजावे लागतील. या बंदुकीसोबतच एक स्टायलिश लेदर होल्डर मोफत दिलं जातंय. शिवाय, 24 लाईव्ह आणि 24 ब्लॅक कार्टेजेस देखील देण्यात येताहेत. बंदुकीच्या रिंगच्या मदतीनं बेल्टला लटकावण्याची सोय देखील यात उपलब्ध आहे. या बंदुकीसाठी घड्याळ आणि ज्वेलरी तयार करण्यासाठीच्या तंत्राचा वापर करण्यात आलाय.

जगातील ही सर्वात छोटी बंदूक इतर बंदुकींप्रमाणे काम करते. या छोटी बंदुकीची नोंद गिनीज वर्ल्ड रेकॉर्डमध्ये झालीय. या बंदुकीचं खास वैशिष्ट्य म्हणजे, ही बंदूक इतकी छोटी आहे, की ती लपवणं सहज शक्य आहे. शर्टाच्या खिशात, ट्राऊझरच्या खिशात, वॉलेटमध्ये अथवा केसातही ही बंदूक लपवता येऊ शकते. त्याच्या याच गुणामुळं काही देशांनी या बंदुकीच्या आयातीवर बंदी घातलीय. विशेषतः अमेरिका आणि ब्रिटन या देशांनी ही बंदूक आयात करण्यावर बंदी घातली असून ती बाळगणं बेकायदेशीर ठरवलंय.