तुमच्या शरीरात (Body ) लोहाची ( Iron) कमतरता असल्याने अनेक समस्या निर्माण होतात. आपल्या शरीरात लोह हे अत्यंत आवश्यक पोषक तत्व असून ते शरीरात ऑक्सिजन (oxygen) पोहोचवण्याचे काम करते. आरोग्य तज्ज्ञांच्या मते लोह हिमोग्लोबिनचा महत्वाचा घटक आहे. लोहाच्या कमतरतेमुळे शरीरात लाल रक्तपेशी तयार होतात. शरीरातल्या लाल रक्तपेशी कमी प्रमाणात असल्यास त्याला लोहाच्या कमतरतेमुळे निर्माण झालेला एनीमिया म्हणतात. भारतात पुरूषांच्या तुलनेत महिलांमध्ये एनीमियाची समस्या जास्त आढळते. लोह कमी असल्याची लक्षणे लोकांना सहज आणि लगेच कळत नाहीत.

लोहाच्या कमतरतेची लक्षणे

लोहाच्या कमतरतेमुळे शरीरात थकवा, अशक्तपणा, त्वचा पिवळी पडणे, श्वास घ्यायला त्रास होणे, बेशुद्ध पडणे, डोकेदुखी, हृदयाची गती वाढणे, हात-पाय थंड पडणे, केस गळणे, तोंड येणे, घसा खवखवणे, जीभ सुजणे आदी प्रकार दिसून येतात.

शरीराला इतकी आहे गरज

आरोग्य तज्ज्ञांच्या मते, एखाद्या व्यक्तीचे वय, लिंग, तसेच त्याच्या तब्येतीवर त्याला लोहाची किती गरज आहे ते अवलंबून असते. नवजात बालकांना आणि लहान मुलांची वाढ पटापट होत असल्याने मोठ्यांच्या तुलनेत त्यांना लोहाची जास्त गरज असते. लहानपणी मुला-मुलींना समप्रमाणात लोहाची आवश्यकता असते. ४ ते ८ वय असलेल्यांना रोज १० मिलीग्रॅम, ९ ते १३ वय असलेल्यांना रोज ८ मिलीग्रॅम लोहाची आवश्यकता असते. तर महिलांना मासिक पाळीदरम्यान शरीरातून भरपूर प्रमाणात रक्तस्त्राव होतो. डॉक्टरांच्या सल्ल्यानुसार १९ ते ५० वयोगटातील महिलांनी दररोज १८ मिलीग्रॅम लोह घेणे गरजेचे आहे. तर समान वयोगटातील पुरूषांना ८ मिलीग्रॅम लोह पुरेसे आहे. तर गर्भवती आणि ब्रेस्ट फिडिंग करणाऱ्या बायका, किडनीचा आजार असलेले, अल्सर, गॅस्ट्रोइंटेस्टाइनल समस्या, वजन कमी करण्यासाठी शस्त्रक्रिया, खूप जास्त व्यायाम करणारे लोक तसेच शाकाहारी लोकांनी अधिक प्रमाणात लोह घ्यावे असा सल्ला डॉक्टर देतात.

या पदार्थांचा करा समावेश

चिकन, अंडी, मासे, डाळी,मटार, फरसबीसारख्या शेंगा, पालक, हिरवे वाटाणे, ब्रोकोली, कडधान्ये यामध्ये मोठ्या प्रमाणात लोह असते. शरीरात लोहाचे प्रमाण चांगले असावे यासाठी आहारात या पदार्थांचा समावेश करणे गरजेचे आहे.