नशिराबाद (ता. जळगाव) : येथे किरकोळ कारणावरून दोन जणांमध्ये वाद झाले. त्याचे पर्यावसन दोन गटांत तुंबळ हाणामारीत झाले. या प्रकरणी दोन्ही गटांतील १४ जणांविरुद्ध गुन्हा दाखल झाला आहे.

येथील बोगद्याजवळ रविवारी (ता. २५) सायंकाळी पावणेसहाच्या सुमारास दुचाकी अचानक समोर आल्याने लोकेश नारखेडे याचे काका रमेश नारखेडे यांनी ‘गाडी व्यवस्थित चालव’, असे चालकाला सांगितले. त्याचा राग आल्याने बाचाबाची व शिवीगाळ होऊन दोन गटांत लाथाबुक्यांनी व कमरेच्या पट्याने हाणामारी झाली. (2 groups clash at Nasirabad Riot case against 14 persons Jalgaon Crime News)

हेही वाचा : क्रेडिट कार्ड वापरताय...मग या गोष्टी माहिती हव्याच...

याप्रकरणी लोकेश नारखेडे यांनी दिलेल्या फिर्यादीवरून गुन्हा दाखल झाला आहे. दुसऱ्या गटातील मुजाहिद खान रऊफ खान यांनी दिलेल्या फिर्यादीनुसार, त्यांचे वडील रऊफ खान इनायत खान उभे असताना, पूर्वीच्या वादावरून ७ ते ८ जणांनी त्यांना खाली पाडून मारहाण केली. या घटनेमुळे गावात तणावाचे वातावरण निर्माण झाले होते.

चिघळलेले वातावरण बघता अपर पोलिस अधीक्षक चंद्रकांत गवळी, उपअधीक्षक सोमनाथ वाघचौरे, भुसावळ तालुका पोलिस ठाण्याचे निरीक्षक विलास शेंडे, बाजारपेठचे सहाय्यक पोलिस निरीक्षक हरीश भोये, स्वप्नील नाईक आदी घटनास्थळी दाखल झाले. पोलिसांनी दोन्ही बाजूंच्या १४ लोकांवर गुन्हा दाखल केला असून, पोलिस उपनिरीक्षक राजेंद्र साळुंके तपास करीत आहेत. गावात सध्या तणावपूर्ण शांतता आहे.