Jalgaon Crime News : कत्तलखान्यात जाणारे अवैध वाहतूक पकडल्याचा राग मनात ठेवून एका विशिष्ट टोळक्याने एकत्रित येऊन सहाय्यक पोलिस निरीक्षक व पोलिस कर्मचाऱ्यांवर जीवघेणा हल्ला करून दुखापत केल्याची घटना घडली.

या प्रकरणी पोलिस ताफा मागविण्यात येऊन हल्लेखोरांची धरपकड करण्यात आली असून, पाच जणांना अटक करण्यात आली असून दोन जण फरार झाले आहेत.(attack on police officer in Chopda jalgaon crime news)

अवैधरीत्या गोवंश जातीच्या जनावरांच्या वाहतूक करणाऱ्या लोकांवर पोलिस कारवाई करीत असतात याचा राग मनात धरून सहाय्यक निरीक्षक अजित सावळे व पोलिस कर्मचारी संतोष पारधी यांना शेतपुरा भागात जाणाऱ्या जुना यावल रोडवर नगरपालिकेच्या कत्तलखान्याजवळ सार्वजनिक जागी शुक्रवारी (ता. १) रात्री अकराला सुमारास शेख साजिद शेख सलीम कुरेशी, शेख सऊद शेख सलीम कुरेशी, शेख सलीम ऊर्फ टेन्शन शेख उमर कुरेशी, झियाऊद्दीन गयासुद्दीन काझी, शेख इब्राहिम शेख हमीद कुरेशी, शेख नाजीम शेख युनूस, शोएब सलीम कुरेशी, रईस रज्जाक कुरेशी (सर्व रा. सानेगुरुजी वसाहत, चोपडा) व इतर १० ते १५ लोकांनी सदर ठिकाणी गैरकायद्याची मंडळी जमवून हल्ला चढवून काठीने व फायटरने मारहाण केली.

सहाय्यक निरीक्षक अजित सावळे यांच्या फिर्यादीवरून संशयितांविरुद्ध शहर पोलिस ठाण्यात गुन्हा दाखल करण्यात आला असून, पाच जणांना अटक करण्यात आली आहे. दोन जण पसार झाले आहेत. निरीक्षक के. के. पाटील यांच्या मार्गदर्शनाखाली उपनिरीक्षक घनश्याम तांबे तपास करीत आहेत.