Kirankumar Bakale : स्थानिक गुन्हे शाखेचे तत्कालीन निरीक्षक किरणकुमार बकाले यांनी मराठा समाजाबद्दल केलेल्या वक्तव्याप्रकरणी दाखल गुन्ह्यात सत्र न्यायालयाने त्यांचा अटकपूर्व जामीन अर्ज पुन्हा फेटाळला आहे. बकालेंनी उच्च न्यायालयात फिर्याद रद्दसाठी दाखल केलेल्या अर्जावर ३० ऑक्टोबरला सुनावणी होणार आहे.

बकालेंच्या अटकेसाठी आता सकल मराठा समाज एकत्रित होणार असून, त्यासाठी तीव्र आंदोलन छेडण्याचा इशाराही समाजाने दिला आहे. (court rejected Bakale pre arrest bail session jalgaon news)

मराठा समाजाबद्दल केलेल्या अवमानकारक वक्तव्याप्रकरणी बकालेंवर जिल्हापेठ पोलिस ठाण्यात गुन्हा नोंदविण्यात आला आहे. याप्रकरणी बकाले यांनी अटकपूर्व जामीनअर्ज सत्र न्यायालय जळगाव तथा उच्च न्यायालय छत्रपती संभाजीनगर खंडपीठात दाखल केला होता. तो नामंजूर झालेला आहे.

फिर्याद रद्द अर्जावर ३० तारखेस सुनावणी

बकाले यांनी उच्च नायालयाच्या छत्रपती संभाजीनगर खंडपीठात फौजदारी अर्ज क्र. २४०७/२०२३ या गुन्ह्यातील फिर्याद रद्द करण्यासाठी दाखल केला आहे.

दोन न्यायमूतींच्या पीठाने बकाले यांनी तपास अधिकाऱ्यांना समक्ष हजर होऊन सहकार्य करावे, असे निर्देश दिले होते. त्यावर ४ ऑक्टोबरला सुनावणी होणार होती. मात्र, ती होऊ शकली नाही. त्यासंबंधी कामकाज आता ३० ऑक्टोबरला होणार आहे.

अटकपूर्व जामीन मिळण्यासाठी बकालेंच्या वतीने पुन्हा सत्र न्यायालयात २१ ऑक्टोबरला अर्ज दाखल केला. त्यावर बुधवारी महिलांच्या वतीने हरकत दाखल करण्यासाठी मुदत मिळावी म्हणून अॕड. गोपाळ जळमकर व कुणाल पवार यांचे वकीलपत्र दाखल करण्यात आले.

सत्र न्यायाधीश बी. एस. वावरे यांनी ३१ तारखेपर्यंत हरकत दाखल करणेसाठी मुदत दिली आहे. बकालेंच्या वकिलांनी तात्पुरता जामीन मंजूर करावा यासाठी विनंती केली. परंतु सत्र न्यायालयाने ती अमान्य केली व पुढील सुनावणी ३१ ऑक्टोबरला ठेवली.