जळगाव : गंभीर गुन्ह्यात अडकवण्यासाठी विजय पाटील व किरणकुमार साळुंखे यांनी भोईटेंच्या घरात रक्ताने माखलेला चाकू आणि काही फायली प्लांट केल्याची तक्रार नीलेश भोईटे यांनी शहर पोलिस ठाण्यात दिली आहे. याप्रकरणी विजय पाटील, किरण साळुंखे यांच्याविरुद्ध गुन्हा दाखल झाला.

जळगाव जिल्‍हा विद्याप्रसारक संस्थेचा ताबा मिळवण्यासाठी नीलेश भोईटे आणि ॲड. विजय पाटील गटामध्ये काही वर्षापासून वाद सुरू आहेत. वाद विकोपाला जाऊन परस्पर विरुद्ध गुन्ह्याचे सत्र सुरूच असून, काल रात्री उशिरा भोईटे यांनी शहर पोलिस ठाण्यात या प्रकरणी तक्रार दिली.(Crime Case Many Crime Related Samples observed in Bhoite house Jalgaon News)

भोईटे यांनी दिलेल्या फिर्यादीनुसार त्यांच्याविरुद्ध निंभोरा पोलिस ठाण्यात दाखल गुन्हा पुणे येथे वर्ग केला आहे. दाखल गुन्ह्यात कोथरूड पोलिसांनी भोईंटेच्या जळगावच्या घरी कोणीही नसताना (ता. ९ जानेवारी २०२२) छापा टाकला होता.

या कारवाईत पोलिसांनी तपासणी केल्यानंतर विजय पाटील व किरणकुमार साळुंखे असे दोघे त्यांच्या स्विफ्ट डिझायरने (एमएच-२०-बीएन-०९०) रात्री सव्वादहा ते साडेदहाच्या सुमारास त्यांच्या इतर साथीदारांसोबत आले. त्यांनी बेकायदेशीरपणे घरात प्रवेश केला.

घरात प्रवेश केल्यानंतर सोबत आणलेल्या पिशवीत काही फायली व रक्ताने माखलेला चाकू घरात ठेवला. यामागे मला गंभीर गुन्ह्यात अडकवण्याचा कट आहे. या सर्व बाबींचे सीसीटीव्ही फुटेज व रेकॉर्डिंग असल्याचे भोईटे यांनी तक्रारीत म्हटले आहे. याप्रकरणी शहर पोलिसांत विजय पाटील, किरणकुमार साळुंखे व साथीदारांविरूद्ध गुन्हा दाखल झाला असून, पुढील तपास निरीक्षक विजयकुमार ठाकूरवाड करत आहे.