Jalgaon Leopard News : उसाच्या शेतात मिळून आलेल्या बिबटच्या दोन्ही बछड्यांची अखेर त्यांच्या आईची भेट घडवून आणण्यात वन विभागाला यश आले. वनपरिक्षेत्र अधिकारी शीतल नगराळे यांच्या सुयोग्य नियोजनामुळे दोन्ही बछडे त्यांच्या आईच्या कुशीत स्थिरावले.

आपल्या दोन्ही पिलांना घेऊन बिबट मादीने रात्रीच्या सुमारास जंगलाकडे धूम ठोकली. हा प्रसंग वन विभागाच्या ट्रॅप कॅमेऱ्यात टिपला गेला. आज सकाळी हे चित्रण पाहून वन विभागाच्या कर्मचाऱ्यांना सुखद धक्का मिळाला. (forest department succeeded tiger cubs to finally meet their mother jalgaon news)

बहाळ (ता. चाळीसगाव) शिवारातील खेडगाव रस्त्यालगत गुढे येथील शेतकरी पुंडलिक चौधरी यांच्या शेतात मंगळवारी (ता. ७) ऊस तोड सुरू सकाळी साडेदहाच्या सुमारास कामगारांना बिबट्याचे दोन बछडे आढळले होते. ही माहिती वन विभागाला दिल्यानंतर वनपरिक्षेत्र अधिकारी शीतल नगराळे व कर्मचारी काही वेळातच दाखल झाले.

नर व मादी जातीचे हे बछडे आपल्या आईपासून दुरावले जाऊ नये, यासाठी त्यांना सुरक्षितरित्या त्याच ठिकाणी स्वतः शीतल नगराळे यांच्या मार्गदर्शनाखाली प्लास्टिकच्या कॅरेटमध्ये ठेवण्यात आले. आई व पिलांची भेट होते की नाही, हे पाहण्यासाठी शेतात ट्रॅप कॅमेरा लावण्यात आला होता. या पिलांना घेण्यासाठी त्यांची आई आल्याशिवाय राहणार नाही, असा नगराळे यांच्यासह वन कर्मचाऱ्यांना विश्‍वास होता.

त्यानुसार सायंकाळी साडेसातच्या सुमारास अंधार पडल्यानंतर अपेक्षेप्रमाणे बिबट मादी पिलांना शोधत आली. पिलांजवळ येताच कॅरेटवर ठेवलेला पुठ्‍ठा तिने पंजा मारुन खाली पाडला. कॅरेट मोकळे झाल्यानंतर एका पिलाला आपल्या तोंडात उचलून ती घेऊन गेली. काही मिनिटातच ती दुसऱ्या पिलाला अशाच पद्धतीने घेऊन जंगलात निघून गेली. हे सर्व चित्रण कॅमेऱ्यात कैद झाले.

दोन्ही बछड्यांची आपल्या आईची भेट झाल्याने वन विभागाच्या कर्मचाऱ्यांनी सुटकेचा निःश्‍वास टाकला. ही भेट घडवून आणण्यासाठी शीतल नगराळे यांच्यासह जुवार्डीचे वनपाल सी. व्ही. पाटील, काळू पवार, राहुल पाटील, राहुल मांडोळे, योगेश देशमुख, अजय महिरे, दिनेश कुलकर्णी, मोनिका निकम, वंदना विसपुते, माधुरी जाधव, भटू अहिरे आदी कर्मचाऱ्यांचे सहकार्य लाभले.