जळगाव : निमखेडी शिवारातील साईविहार कॉलनीत २९ जून रोजी मध्यरात्री अंगणात लावलेल्या दोन कार पेटवून देत १० लाखांची खंडणी मागणाऱ्या कथित गब्बर गँगच्या दोघांना तालुका पोलीसांनी मंगळवारी (ता. १२) यावल शहरातून सिनेस्टाईल, सापळा रचत अटक केली आहे. सुरेश रमेश लहासे (रा. पहूर, ता. जामनेर) आणि राजू समाधान कोळी (रा. गोदरी, ता. जामनेर) अशी अटकेतील संशयितांची नावे आहेत. (Latest Marathi News)

निमखेडी शिवारातील साईविहार येथील रहिवासी हरीश वरूडकर यांची कार (क्रमांक. एमएच २० डीजे ७३१६) व आनंद युवराज पाटील यांची कार (क्रमांक. एमएच १९ सीझेड ४४३०) अंगणात लावलेल्या होत्या. २९ जून रोजी मध्यरात्री १.३० वाजेच्या सुमारास संशयितांनी पार्किंगला लावलेल्या दोन्ही कार पेटवून दिल्या होत्या. वाहनांना आग लावून जाळपोळ करणाऱ्यांनी चिठ्ठी लिहून १० लाख रूपयांची मागणी केली होत. चिठ्ठीच्या खाली सुलतान भाई गब्बर गँग असा उल्लेख केला आहे. त्यानुसार जळगाव तालुका पोलिस ठाण्यात गुन्हा दाखल करण्यात आला होता.

धमकावले अन्‌ फसला

या गुन्ह्याचा शोध सुरू असताना ६ जुलै रोजी पुन्हा अज्ञात व्यक्तीने व्हॉटसॲपच्या माध्यमातून १० लाखांऐवजी १५ लाखांची मागणी करत कुटुंबाला जीवे ठार मारण्याची धमकी दिली. त्यानंतर ११ जुलै रोजी पुन्हा मॅसेज करून एकाच्या घरातील भाडेकरू सुरेश रमेश लहासे (रा. पहूर ता. जामनेर) राहत असलेल्या व्यक्तीकडे मोबाईल देण्यास सांगितले. त्यावरून पोलिसांना संशय आला, त्यानुसार पोलीसांनी कारवाईला सुरूवात केली.

अन्‌ दोघांना अटक

मंगळवारी (ता. १२) सकाळी अज्ञात व्यक्तीने सुरेश लहासे याला मोबाईल घेऊन यावल येथे येण्यास सांगितले. त्यानुसार पोलिसांनी सापळा रचला. सुरेश लहासे हा अजिंठा चौकात (एमएच २० ईजे ५९४२) कारमध्ये एकासोबत बसलेला पोलिसांना दिसून आला. पोलिसांनी कारचा पाठलाग करून यावल येथे गाठले. यावल येथील पंचायत समितीच्या आवारात गाडी लावलेली दिसून आली. पोलिसांनी सापळा रचून संशयित आरोपी सुरेश रमेश लहासे आणि राजू समाधान कोळी यांना अटक केली. या दोघांनी गब्बर गँगची दहशत माजवण्यासाठी जवळपास अठरा ते विस लोकांना असे पत्र पाठवून धमकावल्याचे उघडकीस आले असून तपासात इतर बाबींचा खुलासा होणार आहे.