Jalgaon Chougaon Fort : तालुक्यातील ऐतिहासिक वारसा असलेल्या किल्ले चौगाव येथे दरवर्षाप्रमाणे दीपावलीनिमित्ताने गडपूजन सोहळ्याचे आयोजन करण्यात आले होते. 'आधी तोरण गडाला, मग माझ्या दाराला' ही भावना उराशी बाळगून मावळ्यांनी मोठ्या उत्साहात गडपूजन केले. (Gad Pujan at Fort Chaugaon jalgaon news)

ज्याप्रमाणे दिवाळीला आपले घर स्वच्छ केले जाते, फुलहार, तोरण, आकाश कंदील लावून सजावट केली जाते, त्याचप्रमाणे राज्याचा ऐतिहासिक, सांस्कृतिक वारसा असलेल्या आपल्या किल्ल्याला देखील स्वच्छ करावे, गडपूजन करून त्यावर तोरण लावावे, हा उद्देश मनाशी घेऊन धनत्रयोदशीच्या शुभमुहूर्तावर किल्ले चौगाव येथील गडाचे गडपूजन झाले.

स्वराज्यातील गड, किल्ले हेच मावळ्यांचे धन असून, त्याच धनाचे संवर्धन आणि पूजा धनत्रयोदशीच्या दिवशी करावी, या उद्देशाने ऐतिहासिक वारसा संवर्धन कृती समिती चोपडा, राजा शिवछत्रपती परिवार जळगाव, टीम खानदेश एक्सप्लोर, शिवशंभु प्रतिष्ठान जळगाव यांच्या संयुक्त विद्यमाने हा गडपूजन सोहळा साजरा करण्यात आला. या वेळी अनेक बालमावळे, रणरागिणी आणि परिवाराचे मावळे मोठ्या संख्येने उपस्थित होते.

मावळ्यांनी सर्वप्रथम प्रवेशद्वारावरील स्वच्छता करून गडाच्या प्रवेशद्वारावर सुंदर तोरण बांधले. गडाच्या पहिल्या पायरीला हार, तोरण, फुले, कुंकू अर्पण करत गडपूजन केले. भविष्यातही गडसंवर्धन करत राहण्याची प्रतिज्ञा घेतली. या वेळी मावळ्यांच्या घोषणांनी गड परिसर निनादून गेला.

किल्ले चौगाव आणि इतरही ऐतिहासिक वारसा स्थळांचे जतन आणि संवर्धन करण्याचे महत्त्व आणि किल्ले चौगावची ऐतिहासिक माहिती प्रताप विद्या मंदिराचे इतिहास शिक्षक पंकज शिंदे यांनी आपल्या मनोगतातून दिली. या वेळी चौगाव वन व्यवस्थापन समितीचे अध्यक्ष विश्राम तेले, महेंद्र राजपूत, नितीन पाटील, गणेश कोळी, विजय ढीवरे, दिनेश पाटील, शिवराजे शिंदे, निशांत पाटील, अवधेश पाटील, अन्विषा पाटील आणि मावळे मोठ्या संख्येने उपस्थित होते.