पाचोरा (जि. जळगाव) : तालुक्यातील एका गावात १४ वर्षीय मुलीवर गावातीलच पाच ते सहा नराधमांनी उचलून नेत सामूहिक लैंगिक अत्याचार (Gang rape) केल्याचे प्रकरण उघडकीस आले असून, यामुळे तालुक्यात खळबळ उडाली आहे. पोलिस संशयितांच्या शोधात गुंतले आहेत. (Gang Rape on a minor girl Jalgaon Crime News)

ग्रामीण भागातील एका गावात १४ वर्षीय मुलगी शुक्रवारी (ता. १३) रात्री गल्लीतच मैत्रिणींसोबत गप्पा मारत उभी होती. घराकडे परतत असताना ती गायब झाली. उशिरापर्यंत घरी न आल्याने तिचा शोध घेण्यात आला. गावातील २० ते २५ दुचाकीस्वारांनी मध्यरात्रीपर्यंत गावाचा परिसर व शेतशिवार पिंजून काढले. गावातीलच पाच ते सहा नराधमांनी या अल्पवयीन मुलीला उचलून नेत तिच्यावर सामूहिक लैंगिक अत्याचार केला व पहाटे तीनच्या सुमारास गावालगतच्या महिला शौचालयाजवळ मुलीस सोडून ते पसार झाले.

पीडित बालिका विव्हळत घरी आल्यावर हा प्रकार कळाला. पीडित बालिकेस पाचोरा ग्रामीण रुग्णालयात दाखल करण्यात आले. पोलिसात नोंद नसली तरी पीडितेचा जबाब नोंदविण्यात आला असून, ती प्रचंड भांबावलेली असल्याने व तिची मानसिक अवस्था ठीक नसल्याने जबाब देण्यात अडचणी आहेत. नराधम संशयित गावातीलच असल्याचे सांगण्यात येत असून, पोलिस पथके त्यांच्या शोधार्थ रवाना झाली आहेत. या घटनेमुळे खळबळ उडाली असून, संतप्त भावना व्यक्त होत आहेत.