जळगाव : मुंबई, पुणे येथे कोरोनाबाधितांची (Corona) संख्या दिवसेंदिवस वाढत आहे. यामुळे जळगाव जिल्ह्यातील आरोग्य विभाग सतर्क झाला आहे. वरील शहरातून आपल्या गावात येणाऱ्या नागरिकांची कोरोना चाचणी कराच, सोबतच ज्यांना सर्दी, खोकला, ताप आला आहे, अशांचीही कोरोना चाचणी करण्याच्या सूचना जिल्हा शल्यचिकित्सक डॉ. किरण पाटील ग्रामीण भागातील आरोग्य यंत्रणेला दिल्या आहेत. दररोज कमीत कमी ५० कोरोनाच्या चाचण्या करण्याच्या सूचनाही आहेत. (Health department instructions to increase corona tests)

कोरोना महामारीने अनेकांची कुटुंबे उद्‌ध्वस्त केली आहेत. यामुळे कोरोनापासून दोन हात दूरच राहण्याचा सल्ला आरोग्य विभागाने दिला आहे. कोरोनाबाधितांची संख्या जिल्ह्यात दिवसेंदिवस वाढत आहे. यामुळे लसींचे दोन डोस घ्या, बुस्टर डोसही घ्या. यामुळे किमान इम्युनिटी वाढेल. मास्क नेहमी वापरा, वारंवार हात धुणे केव्हाही चांगले आहे. तिसरी लाट जशी आपण थोपविली तशी चौथी लाटही थोपवू. मात्र त्यासाठी स्वयंशिस्त पाळा, असे आवाहन तज्ज्ञांकडून करण्यात येत आहे. ताप, सर्दी, खोकला आला तर त्याच्या संपर्कात आलेल्यांची कोरोना चाचणी करावी. जर रुग्ण पॉझिटिव्ह आला तर त्यावर लागलीच उपचार करता येतील.

भीती नको, सतर्कता बाळगा

नागरिकांना कोरोनाची भीती न बाळगता सतर्कता बाळगावी. घराबाहेर पडताना तोंडाला मास्क लावा, हस्तांदोलन टाळा, गर्दीत जाणे टाळा. वारंवार हात धुवा, असे केल्याने कोरोनाचे विषाणू लांबच राहतील, असे जिल्हा शल्यचिकित्सक डॉ. किरण पाटील यांनी ‘सकाळ’ला सांगितले.