गणपूर : चोपडा तालुक्यात बऱ्याच शिवारात गेल्या महिन्यापर्यंत कापसाला असलेल्या चांगल्या भावामुळे कपाशीचे फरदडचे क्षेत्र मोठ्या प्रमाणावर दिसत होते. मात्र, बोंडअळीने डोके वर काढल्याने हे पीक आता काढून त्यावर दुसऱ्या पिकाची पेरणी होताना दिसत आहे.

कापसाचे बाजार पंधरवड्यापूर्वी नऊ हजार चारशे रुपयांपर्यंत पोचले होते. त्यामुळे बऱ्याच शेतकऱ्यांनी कपाशीचे फरदडचे पीक घेण्याचा निर्णय घेतला. मात्र, बोंडअळी दिसू लागल्याने या पिकापासून उत्पन्नाची आशा मावळू लागली आहे. (Infestation of bollworm in fardar crop Jalgaon News pvc99)

हेही वाचा : जोखमीचे भान राखूनच करा SIP मध्ये गुंतवणूक

शिवाय वेचणीची मजुरीही जास्त लागणार असल्याने हे पीक उपटून मका, गहू, बाजरी, भुईमूग आदी पिकांची पेरणी त्या क्षेत्रावर होताना दिसत आहे.

या वर्षी पावसाळ्यात कपाशीच्या पिकात बोंडअळी दिसून आली नाही. मात्र, डिसेंबरमध्ये फवारणीकडे कानाडोळा होताच बोंडअळी वाढल्याने खानदेशात फरदडचे क्षेत्र घटण्याची चिन्हे आहेत.