अमळनेर : शहरातील लक्झरीमालकावर चाकूने जीवघेणा हल्ला करून फरारी झालेल्या सराईत गुन्हेगार दाऊद उर्फ शुभम देशमुख याला अटक करण्यात पोलिसांना यश आले आहे. काही दिवसांपूर्वी शुभम देशमुख उर्फ दाऊद याने जयवंत पाटील या लक्झरीमालकाशी वाद घालत पोटात चाकू मारला होता. त्यात त्यांना गंभीर जखमा झाल्या होत्या. (Jalgaon Crime Shubham Deshmukh arrested in knife attack)

हल्ला केल्यानंतर देशमुख फरारी झाला होता. तो शहरात आल्याची चर्चा होती; मात्र पोलिसांच्या हातात लागत नव्हता. शहरातील विविध क्षेत्रांतील नागरिकांनी गुन्हेगारांना अटक करण्याचे आवाहन देऊन आंदोलनाचा इशारा दिला होता.

डीवायएसपी सुनील नंदवाळकर यांना देशमुख हा धुळे येथे मालेगाव रस्त्यावर खानदेश खाणावळीत जेवण करीत असल्याची गोपनीय माहिती मिळाली. नंदवाळकर यांनी त्वरित पोलिस निरीक्षक विकास देवरे यांना शुभमला अटक करण्यासाठी पथक पाठविण्याचे आदेश दिले. देवरे यांनी सहाय्यक पोलिस निरीक्षक अजित सावळे.

अमोल पाटील, जितेंद्र निकुंभे, नीलेश मोरे, सागर साळुंखे, मधुकर पाटील यांच्या पथकाला रवाना केले. तोपर्यंत दाऊद तेथून पळून जाऊ नये म्हणून त्याला ताब्यात घेण्यासाठी नंदवाळकर यांनी आझाद नगर पोलिस ठाण्याचे पोलिस गौतम सपकाळे, अझरुद्दीन जयरोद्दीन शेख यांना पाठविले. धुळे पोलिसांनी त्याला ताब्यात घेतल्यानंतर अमळनेर पोलिसांनी शुभमला अटक केली आहे.