Jalgaon Summer Heat : जिल्ह्यातील तापमानाने सोमवारी (ता. २०) उच्चांकी ४६ अंश गाठले. यंदाच्या उन्हाळ्यात एवढे तापमान होण्याची ही पहिलीच वेळ आहे. गेल्या दोन दिवसांपासून सलग ४४ अंश तापमान होते. सोमवारी तापमानात दोन अंशांनी वाढ होऊन ते ४६ अंशांवर पोचल्याने अंगाची लाहीलाही होत आहे. (Jalgaon District temperature at 46 degrees)

गेल्या दोन दिवसांपासून सकाळी दहापासूनच उन्हाचे चटके बसत आहेत. रात्री आठपर्यंत उन्हाच्या झळ जाणवत आहेत. वृद्धांसह बालके, गर्भवती महिलांना उन्हाचा त्रास होत आहे. सर्वच नागरिक उन्हामुळे हैराण झाले आहेत. सकाळपासून उन्हाच्या कडाक्याने अंगाची लाहीलाही होत आहे.

बाजारापेठांमध्ये ग्रीननेट लावून सावली मिळविण्याचा प्रयत्न केला जात आहे. अपार्टमेंट, दुमजली घरांवरही ग्रीननेट लावून सावली मिळविली जात आहे. उन्हाच्या तीव्रतेने बाजारपेठा दुपारी ओस पडत आहे. रस्त्यावरील शुकशुकाट वाढला आहे. महामार्गावरही मोठी वाहने झाडाच्या सावलीत लावून नागरिक विश्रांती घेताना दिसतात.

थंड पाण्याची मागणी वाढली

उन्हामुळे शरीरातून घामाच्या धारा बाहेर पडतात. घशाला कोरड पडून जीव पाणी पाणी करतो. यामुळे बाजारात थंड पाण्याला मागणी वाढली आहे. शहरात आलेला प्रत्येक नागरिक पाण्याची बाटली कोठे मिळेल, याचा शोध घेऊन तृष्णा शमविताना दिसत आहे. थंड पाण्याबरोबरच शीतपेयांनाही मागणी वाढली आहे. (latest marathi news)

जिल्ह्यातील तापमान असे

जळगाव : ४६.१ अंश

भुसावळ : ४६.४

अमळनेर : ४६

बोदवड : ४६.१

भडगाव : ४६.२

चोपडा : ४६.३

चाळीसगाव : ४६.१

धरणगाव : ४६.२

एरंडोल : ४६

फैजपूर : ४६

जामनेर : ४६.४

मुक्ताईनगर : ४६.४

पारोळा : ४६

पाचोरा : ४६.२

रावेर : ४६.४

वरणगाव : ४६.४

यावल : ४६.३ अंश