जळगाव : महापालिका घरपट्टी व पाणीपट्टी ३१ डिसेंबरच्या मुदतीनंतर भरल्यास दंड आकारणी करण्यात येणार होती. मात्र, आता या दंडाची मुदत ३१ जानेवारीपर्यंत वाढविण्यात आल्याचे आदेश आयुक्त देवीदास पवार यांनी काढले आहेत.

हेही वाचा: जोखमीचे भान राखूनच करा SIP मध्ये गुंतवणूक

या आर्थिक वर्षात महापालिकेची घरपट्टी व पाणीपट्टी कर भरण्यास १ जानेवारीपासून दंड आकारणी करण्याचा निर्णय घेण्यात आला होता. मात्र, त्याची मुदत आता वाढविण्यात आली आहे. ३१ जानेवारीपर्यंत कराची रक्कम भरल्यास कोणत्याही दंडाची आकारणी करण्यात येणार नाही. नागरिकांनी याचा लाभ घेऊन आपल्या कराच्या रकमा त्वरित भराव्यात, असे अवाहनही आयुक्त पवार यांनी केले आहे.

घरपट्टी भरण्यासाठी नागरिकांचा प्रतिसाद चांगला मिळत आहे. शनिवारी (ता. ३०) सुटीच्या दिवशी नागरिकांसाठी कराचा भरणार करण्याची सुविधा उपलब्ध करण्यात आली होती. त्यास नागरिकांचा मोठ्या प्रमाणात प्रतिसाद मिळाला. केवळ चार तासांत तब्बल २३ लाख रुपयांचा भरणा महापालिकेच्या तिजोरीत झाला होता. नागरिकांचा हा प्रतिसाद लक्षात घेऊनच ही सूट वाढविण्यात आली असल्याचे प्रशासनातर्फे सांगण्यात आले.