Bhaubeej 2023 : कुटुंब व समाजात रक्ताची नाती कितीही ताणली गेली तरी सणासुदीला व संकटसमयी ही नाती वृद्धिंगत होऊन एकमेकांच्या मदत व सहकार्यासाठी उभी राहतात.

नातेसंबंधातील व्यक्तींमधील राजकीय, आर्थिक विरोध कितीही विकोपाला गेले तरी पवित्र नाते मात्र कायम राहते, याची प्रचिती पुन्हा एकदा भाऊबीज सणानिमित्त पाचोरावासीयांना आली. (Kishor Patil and Vaishali Suryawanshi celebrated bhaubeej jalgaon news)

अलीकडच्या काळात एकमेकांचे कट्टर राजकीय वैरी बनलेले आमदार किशोर पाटील व शिवसेना गटाच्या नेत्या वैशाली सूर्यवंशी हे भाऊबीज सणानिमित्ताने काही वेळ का असेना एकत्र आले. ताईंनी भाऊ आप्पांना ओवाळले तर भाऊ आप्पांनी भाऊबीज भेट देऊन ताईंचा चरणस्पर्श करत आशीर्वाद मिळवला.

शिवसेना शिंदे गटाचे आमदार किशोर पाटील यांच्या चुलत भगिनी व माजी आमदार (स्व.) आर. ओ. तात्या पाटील यांच्या कन्या व शिवसेना उद्धव ठाकरे गटाच्या नेत्या वैशाली सूर्यवंशी यांच्यातील राजकीय वैर दिवसागणिक विकोपाला जात असले तरी रक्षाबंधन व भाऊबीज सणानिमित्त एकत्र येण्याची गेल्या अनेक वर्षांपासूनची त्यांची परंपरा मात्र कायम असल्याचे स्पष्ट झाले.

भाऊबीज सण असल्याने बुधवारी (ता. १५) दुपारी दीडच्या सुमारास आमदार किशोर पाटील हे बहीण वैशाली सूर्यवंशी यांच्या निवासस्थानी दाखल झाले. वैशाली सूर्यवंशी यांनीही हसतमुखाने त्यांचे स्वागत केले.

दिवा ओवाळत, कपाळी टिळा लावत, पेढा भरवत भाऊबीजनिमित्त राजकीय विरोधक असलेल्या भावाची ओवाळणी केली. आमदार किशोर पाटील यांनी बहिणीचा चरणस्पर्श करून भाऊबीजेची भेट दिली व हसतमुखाने ते माघारी परतले. बहीण-भावाच्या पवित्र नात्यात राजकीय विरोध अखेर फिका पडला. भाऊ- बहिणीच्या या भाऊबीजेची चर्चा राजकीय गोटात रंगली आहे.