जळगाव  : शहरातील शाहूनगर परिसरात आलेल्या शाहूनगर कॉम्प्लेक्‍समध्ये भाटिया आइस्क्रीम व पार्लर दुकान अज्ञात चोरट्यांनी फोडून आत निवांत दारूचे पेग रिचवुन स्नॅक्‍स वर तावमारला. दारू ढोसल्यानंतर दुकानातूनच सिगारेटही ओढल्या नंतर मिळेल ते साहित्य घेऊन चोरटे पसार झाले. चोरटे एवढ्यावरच न थांबता त्यांनी चोरी केल्यानंतर दुकानाला आग लावून दिली. याप्रकरणी शहर पोलिस ठाण्यात गुन्हा दाखल करण्यात आला आहे. 

दुकानदार सुरेंद्र नवनीतलाल भाटिया (वय-62 रा. सुयोग अपार्टमेंट) यांनी दिलेल्या माहिती नुसार, त्यांचे शाहूनगर कॉम्प्लेक्‍समध्ये भाटिया आइस्क्रीम व कोल्ड्रींक्‍सचे दुकान आहे. लॉकडाऊन मुळे दुकान 23 मार्च पासून बंदावस्थेत होते. गुरुवारी मध्यरात्री अज्ञात चोरट्यांनी टॉमीने शटर वाकवून आत प्रवेश केला. आत चोरट्यांनी चॉकलेट, कोल्ड्रिंक्‍स व बिस्किटांवर ताव मारला काही माल चोरी करून नेला. 

चोरी पुर्वी दुकाना मद्यप्राशन 
चोरट्यांनी दुकानातील फ्रिजमधून बिसलरी पाण्याची बाटली काढून सोबत आणलेली दारू प्यायले. दुकानातीलच स्नॅक्‍स व सिगारेटचा आनंद घेतला. नंतर मिळेल ते साहित्य काही रोकड चोरून नेली. दुकानावरील मजल्यावर चोरट्यांनी आग लावून पोबारा केला. त्यात कोल्ड्रींगच्या बाटल्या काही कागदाचे खोके, कुलरसह आदी साहित्य जळून खाक झाला आहे.पोलिसांना घटनास्थळी दारूची व पाण्याची बाटली मिळून आली आहे. 

गुरुवारी मध्यरात्री आग लागल्यानंतर चोरटे पसार झाले. पहाटे पाच वाजेच्या सुमारास मार्केट समोरील रहिवासी अँड. मंगेश सरोदे यांनी दुकानमालक सुरेंद्र भाटिया यांना फोनवरून दुकानातून धूर निघत असल्याचे सांगितले. भाटिया यांनी दुकानावर येऊन पाहणी केली असता दुकान चोरी व दुकानाला आग लागलेली होती. त्यांनी तातडीने महानगरपालिकेच्या बंबाला बोलावून आग विझविण्यात आली. याप्रकरणी शहर पोलिस ठाण्यात गुन्हा दाखल करण्यात आला आहे.