जळगाव ः दोन दिवसांनी होणारा कडक लॉकडाउन, किराणा भेटणार नाही, इतर साहित्य तर लांबच यामुळे आज ज्या ज्या आवश्‍यक वस्तू आहे, किराणा याची खरेदीसाठी बाजारपेठेत नागरिकांची झुंबड उडाली होती. रविवार सुटीचा दिवस असतो, मात्र आज रस्त्यावर नागरिकांची वर्दळ होती. 

शहरातील डी मार्टसह किराणा माल विक्रीचे सूपरशॉप, विविध ठिकाणी असलेल्या किराणा दुकानात नागरिकांनी सामान करण्यासाठी गर्दी सकाळी नऊपासून झाली होती. काहींनी आठ दिवसात लागणारा किराणा तर काहींनी महिनाभर पुरेल एवढा किराणा घेतला. शहरात सम, विषम तारखांना दूकाना सुरू असतात जी दुकाने सुरू होती त्यात कपडयांसह विविध वस्तूंच्या दुकानांवरही गर्दीचे चित्र होते. 

उद्या (ता.6) गर्दीचा उच्चांक होईल, आपल्याला सामान मिळेल की नाही याची धास्ती घेत आजच नागरिकांनी किराणासह विविध वस्तू खरेदी केल्या. 
जिल्ह्यात कोरोना बाधीतांची संख्या दिवसेंदिवस वाढत आहे, नागरिक नियमांचे पालन करीत नसल्याने लॉकडाउनशिवाय दुसरा पर्याय जिल्हा प्रशासनाकडे नाही. यामुळे मंगळवारपासून (ता.7) सात दिवसांचा लॉकडाउन जळगाव शहरासह भुसावळ, अमळनेर पालिका क्षेत्रात लॉकडाउनचा निर्णय घेण्यात आला आहे.   

काय बंद अन काय सूरू याचीच चर्चा 
गर्दीतही नागरिक परवापासून काय बंद आहे, काय सुरू राहिल. गाडी नेता येणार आहे किवा नाही, नेली तर पोलिस अडवतील, त्यांना काय उत्तरे दयायची याची खमंग चर्चा ऐकायला मिळाली.