Jalgaon Crime News : चिंचोली (ता. जळगाव) शिवारातील सरकारी होमिओपॅथी महाविद्यालय आणि रुग्णालयाच्या इमारतीचे बांधकाम सुरू आहे. याठिकाणच्या मोकळ्या जागेत ठेवलेले बांधकाम साहित्य शनिवारच्या (ता. ९) पूर्वी चोरीला गेले.

एमआयडीसी पोलिसांनी चार भामट्यांची टोळी चोवीस तासांमध्ये अटक करत भंगारातून विकलेले साहित्य उघडकीस आणले.(Medical college construction material stolen and sold in scrap jalgaon crime news)

इमारतीच्या बांधकाम परिसरातून स्केअर ट्यूब, इंडियन चॅनल, स्टील रॉड असे जवळपास लाख रुपयांचे साहित्य चोरीला गेले. भांडारपाल नितीन धाईतकड यांच्या तक्रारीनुसार एमआयडीसी पोलिस ठाण्यात गुन्हा दाखल करण्यात आला होता. तपास अधिकारी अल्ताफ पठाण यांच्यासह पोलिस पथक चोरट्यांचा शोध घेत असताना एका भंगार व्यावसायिकाकडे लाखोंचे साहित्य तीन तरुणांनी विक्रीला आणल्याची माहिती पथकाला मिळाली.

पोलिस निरीक्षक जयपाल हिरे यांच्या पथकातील उपनिरीक्षक दीपक जगदाळे, अल्ताफ पठाण, योगेश बारी, सचिन पाटील, राहुल रगडे, विशाल कोळी हे भंगार व्यावसायिकाच्या दुकानात दाखल झाले. त्यावेळी वैद्यकीय महाविद्यालय इमारतीचे चोरीला गेलेले साहित्य त्यांना आढळून आले.

भंगार व्यावसायिक विनायक प्रकाश शेरे (वय २९ रा.सुप्रीम कॉलनी) याची चौकशी केली असता, त्याने हे साहित्य गौरव कैलास चव्हाण (वय १९, रा.मोहाडी), दीपक भावलाल नन्नवरे (वय २७, रा. मोहाडी), उमेश विनोद चव्हाण (वय २५, रा.उमाळा संभाजी चौक) या तिघांनी २५ हजार रुपयांमध्ये विकल्याची माहिती दिली.

त्यानंतर पोलिस पथकाने तिघांचा शोध घेत त्यांना अटक केली. अटकेतील संशयितांनी गुन्ह्याची कबुली दिली असून चोरीचा माल पोलिसांनी जप्त करीत संशयितांना जिल्हा न्यायालयात हजर केले. न्यायालयाने चौघांना पोलिस कोठडीत ठेवण्याचे आदेश दिले आहेत.