जळगाव : शहरातील कुख्यात वाळूमाफिया मुकुंद बलविंदरसिंह ठाकूर याच्यातर्फे जिल्‍हा न्यायालयात अटकपूर्व जामिनासाठी अर्ज सादर करण्यात आला आहे. गेल्या सहा वर्षांपासून फरारी असताना याअगोदर जिल्हा न्यायालय, उच्च न्यायालयासह सर्वोच्च न्यायालयाने त्याचा जामीन फेटाळला असताना आता नव्याने त्याच्या वतीने जामीन अर्ज सादर करण्यात आला आहे.

जळगाव शहर पोलिस ठाण्याच्या हद्दीतील शिवाजीनगर उड्डाणपुलावर एका वाळू डंपरचालकाने पोलिस कर्मचाऱ्यास चिरडण्याचा प्रयत्न केला होता. या प्रकरणी वाळू ठेकेदार मुकुंद ठाकूरसह डंपरचालक आणि इतरांवर प्राणघातक हल्ला केल्या प्रकरणी (२०१६) गुन्हा दाखल करण्यात आला होता. दाखल गुन्ह्यात तब्बल सहा वर्षे ठाकूर फरारी असून, अद्याप जिल्‍हा पोलिस दल त्याला अटक करू शकले नाही.(Most Wanted Mukund Thakur runs for pre arrest bail Jalgaon Crime News)

फरारी असताना ठाकूर आणि त्याच्या टोळीने मिळून कंडारी शिवारातील वनजमिनींचे तुकडे परस्पर विकून कोट्यवधींचा मांजा लाटला. फरारी असताना पाच वर्षांपूर्वी स्थानिक गुन्हे शाखेने गुप्त माहितीवरून त्याच्या मध्य प्रदेशातील ठिकाणावर घेराबंदी केली होती. मात्र, तेव्हा तो पोलिसांच्या हातावर तुरी देत पसार झाला होता.

लोकांना दिसतो, पोलिसांना नाही

प्राप्त माहितीनुसार वाळूमाफिया मुकुंद ठाकूर त्याच्या व्यावसायिक मित्रांना जळगावात येऊन भेटीगाठी घेतो. गेली सहा वर्षे तो जिल्‍हा पोलिस दलास सापडू शकला नाही. इतकेच नाही तर पोलिसाला चिरडण्याच्या प्रयत्नात फरारी असताना त्याने शासकीय वनजमिनी विक्री केल्याचे गंभीर प्रकरण घडले आहे.