जळगाव : राष्ट्रवादी काँग्रेसचे अध्यक्ष शरद पवार (Sharad Pawar) यांच्याबद्दल फेसबुकवर आक्षेपार्ह फोटो टाकून बदनामी केल्याचा प्रकार समोर आला आहे. याप्रकरणी सायबर पोलिस ठाण्यात दोन फेसबूक युजर्सवर गुन्हा दाखल करण्यात आला आहे.

जिल्‍हा साबर पोलिस ठाण्यात दाखल तक्रारीत नमूद केल्याप्रमाणे, राष्ट्रवादी काँग्रेस अध्यक्ष ज्येष्ठ नेते शरद पवार यांचे आक्षेपार्ह फोटो व मजकूर अंकित पाटील आणि हरीश कोळी या नावाच्या फेसबुक युजर्सने टाकून ते व्हायरल केल्याचा प्रकार उघडकीस आला आहे. काही एक कारण नसताना शरद पवार यांची जनमानसात प्रतिमा मलिन करण्याच्या उद्देशाने दोघांनी त्यांच्या फेसबुक अकाऊंटवरुन आक्षेपार्ह पोस्ट व्हायरल केली असून शिवाय या पोस्टवर शिवीगाळ देखील करण्यात आली आहे. घडल्या प्रकाराची गंभीर दखल घेत जळगाव राष्ट्रवादी काँग्रेस पक्षाचे महानगराध्यक्ष अशोक लाडवंजारी यांनी सायबर पोलिस ठाण्यात धाव घेत दोन फेसबूक धारकांविरोधात तक्रार दिली. पोस्ट व्हायरल केल्याप्रकरणी अंकित पाटील आणि हरीश कोळी नावाच्या फेसबुकधारकांविरोधात सायबर पोलिस ठाण्यात गुन्हा दाखल करण्यात आला आहे. पुढील तपास पोलिस निरीक्षक लिलाधर कानडे करीत आहे.