जळगाव : फ्लिपकार्टच्या (Flipkart) पार्सलबाबत तक्रार करण्यासाठी एका तरुणीने त्यांच्या कस्टमर केअरवर संपर्क साधला. तक्रारदार तरुणीला विश्‍वासात घेत तिच्या बँक खात्याचे डिटेल्स विचारुन ४० हजारात फसवणूक केल्याची घटना घडली. जिल्हापेठ पोलिसात या प्रकरणी फसवणुकीचा गुन्हा दाखल करण्यात आला आहे.

शहरातील दंगलग्रस्त कॉलनीतील कौनिक शेख जाहिद (वय १८) या विद्यार्थीनीने फ्लिपकार्ट या ऑनलाईन शॉपिंग वेबसाईटवरुन साहित्य खरेदी केले. त्याचे पार्सल २ जून रोजी पत्त्यावर पोहचले. त्या तरुणीने पार्सलची कस्टमर केअरकडे तक्रारीसाठी संपर्क केला. यावेळी त्यांच्याकडून कौनिक यांना

तक्रारीसाठी वेगळाच क्रमांक देण्यात आला. या क्रमांकावर त्यांनी तक्रार केली असता तक्रार करणाऱ्‍याने त्यांना विश्‍वासात घेत त्यांच्याकडून बँक खात्याची संपूर्ण माहिती जाणून घेतली. आणि काही वेळातच त्यांच्या बँक खात्यातून ३९ हजार ५०० रुपये ऑनलाईल पद्धतीने लंपास करुन घेत त्यांची फसवणूक केली. या प्रकरणी कौनिक शेख जाहिद यांच्या तक्रारीवरुन जिल्हापेठ पोलिसात गुन्हा दाखल करण्यात आला आहे.