जळगाव : सार्वजनिक बांधकाम विभागाच्या अधिकारी निवासस्थानातून गुन्हे शाखेने चक्क ट्रॅक्टर चोरट्याला अटक केली. अटकेतील तरुण वित्त अधिकारी संजय पाटील यांचा मुलगा आकाश असल्याची माहिती गुन्हे शाखेने दिली. त्याचा साथीदार गणेश शिंदे याच्यासह त्याला अटक करण्यात आली.

वरणगावचे उमेश चौधरी यांचा ट्रॅक्टर चोरीला गेला हेाता. ट्रॅक्टर जळगावातील दोन रेकॉर्डवरील संशयितांनी चोरल्याची माहिती स्थानिक गुन्हे शाखेचे निरीक्षक किरणकुमार बकाले यांना मिळाली. त्यावरून गुन्हे शाखेचे कर्मचारी विजय पाटील, सुरेश अंबोरे, राहुल पाटील, पंकज शिंदे यांनी सार्वजनिक बांधकाम विभागाच्या अधिकारी निवासस्थानातून आकाश संजय पाटील याच्यासह पिंप्राळा येथील गणेश राजेंद्र शिंदे याला ताब्यात घेतले. पोलिसी हिसका दाखविताच दोघांनी गुन्हा कबूल केला व चोरून आणलेले ट्रॅक्टर पोलिसांना काढून दिले.

दरम्यान, आकाश पाटील पोलिसांच्या रेकॉर्डवरील संशयित असून, यापूर्वीही त्याला जबरी चोरीत गुन्हे शोखेने अटक केली होती. वडील सार्वजनिक बांधकाम विभागात वित्त अधिकारी आणि पोराचे कारनामे पाहून पहिल्यांदा पोलिसही दचकले होते. चोऱ्या करतो, म्हणून वडिलांनी आकाशला हकलून दिल्याचेही अटक करणाऱ्या पथकाने सांगितले.