Jalgaon Crime News : सिंधी कॉलनी, भाजी मार्केटमध्ये एका दुकानात पडदा लावून संगणकावर चक्री सोरट प्रकाराचा जुगार अड्डा चालवला जात होता.

उपविभागीय पोलीस अधिकारी संदिप गावीत यांच्या पथकाने या ठिकाणी छापा टाकून रोख रकमेसह, संगणक आणि जुगाराचे इतर साहित्य जप्त करुन तिघांना अटक केली आहे. (Raid on Computerized Cyclic Gambling in jalgaon crime news)

याबाबत श्री. गावित यांना माहिती मिळाली होती. त्यानुसार त्यांनी कारवाईच्या सूचना दिल्याने परीविक्षाधीन उपविभागीय पोलिस अधिकारी सतीश कुलकर्णी, उपविभागीय पोलिस अधिकारी कार्यालयातील गोपाळ पाटील, सचिन साळुंखे, एमआयडीसी पोलिस ठाण्याचे उपनिरीक्षक दत्तात्रय पोटे, सचिन पाटील, योगेश बारी आदींचे पथक संबंधित दुकानात पोचले.

तेथे तीन जण टीव्ही स्क्रीनवर गोल चक्री माऊसच्या आधारे ऑपरेट करीत असताना, तर चार ते पाच जण हातात पैसे घेवून उभे असल्याचे आढळून आले.

मात्र, पोलिस आल्याचे पाहताच पैसे घेवून उभे असलेले चार ते पाच जण पळून गेले. तर टीव्ही स्क्रीन ऑपरेट करणारे संतोष नानकराम रामचंदाणी (वय ३२, रा. कंवरनगर), वसीम शहा शब्बीर शहा (वय ३२, रा. तांबापुरा), नीलेश दिनेश सरपटे (वय ३३, नवल कॉलनी) यांना पोलिसांनी ताब्यात घेतले.

या ठिकाणाहून रोख रकमेसह सीपीयू, मॉनिटर, की बोर्ड, माऊस असा एकूण ४७ हजार ४५० रुपयांचा मुद्देमाल जप्त करण्यात आला. या प्रकरणी नाईक सचिन साळुंखे यांच्या फिर्यादीवरू एमआयडीसी पोलिस ठाण्यात तिघांविरुद्ध गुन्हा दाखल करण्यात आला.