पाचोरा : डोंगरगाव (ता. पाचोरा) येथे सायकल दुरुस्तीचा व्यवसाय करून कुटुंबाचा उदरनिर्वाह करणाऱ्या पोपट पाटील यांच्या मुलाने कवयित्री बहिणाबाई विद्यापीठातून पीएच.डी. (डॉक्टरेट) पदवी प्राप्त केली आहे.

भाजीपाला विकत वडिलांच्या संसाराला आधार

पोपट पाटील हे गेल्या अनेक वर्षांपासून सायकल दुरुस्ती करून प्रसंगी भाजीपाला विकून आपल्या कुटुंबाचा चरितार्थ चालवीत आहेत. आपण अशिक्षित असलो तरी मुलांनी मात्र उच्चशिक्षित व्हावे, यासाठीची त्यांची धडपड व मुलांसाठीची प्रेरणा कायम राहिली आहे. त्यांनी आपला मुलगा माणिक यास अत्यंत प्रतिकूल परिस्थितीत एम. ए., बी. एड. व सेटपर्यंत शिकविले. येथील पीटीसी संस्थेच्या एम. एम. महाविद्यालयात माणिक पाटील यांनी प्राध्यापक म्हणून विनाअनुदानित तुकड्यांवर कामही केले. प्रसंगी गावात भाजीपाला विकून आपल्या वडिलांच्या फाटक्या संसाराला आधार देत आपल्या शिक्षणाचा खर्चही भागविला. त्यांनी कवयित्री बहिणाबाई चौधरी उत्तर महाराष्ट्र विद्यापीठात ‘छोडो भारत चळवळीत मराठी वर्तमानपत्रांची भूमिका : एक ऐतिहासिक अभ्यास (महाराष्ट्र)’ या विषयावर प्रबंध सादर केला.

त्यासाठी त्यांना डॉ. प्रशांत देशमुख (शेंदूर्णी) डॉ. बी. एन. पाटील, डॉ. वासुदेव वले, डॉ. जे. व्ही. पाटील, डॉ. जे .डी. गोपाळ, डॉ. नरसिंग परदेशी यांचे मार्गदर्शन लाभले. प्रा. माणिक पाटील यांना कवयित्री बहिणाबाई चौधरी उत्तर महाराष्ट्र विद्यापीठाच्या वतीने ‘डॉक्टरेट’ पदवी मिळाली आहे. त्यांच्या प्रेरणादायी कार्याचे, तसेच जिद्द व धडाडीचे कौतुक होत आहे.