Jalgaon News : जिल्ह्यातील जळगाव व रावेर हे दोन्ही मतदार संघ महाविकास आघाडीच्या माध्यमातून राष्ट्रवादी काँग्रेसकडेच घेण्यात यावेत, त्यात रावेर लोकसभा मतदार प्राधान्याने पक्षाकडेच ठेवावा, अशी मागणी जिल्ह्यातील पक्षाच्या पदाधिकाऱ्यांनी पक्षाचे नेते शरद पवार यांच्यासोबतच्या चर्चेत केली. (Take 2 Lok Sabha from district to only NCP office bearers demand to Sharad Pawar at meeting Jalgaon political News)

जळगाव व रावेर लोकसभेबाबत सोमवारी (ता.८) मुंबईत पक्षाचे नेते शरद पवार व प्रदेशाध्यक्ष जयंत पाटील यांच्या उपस्थितीत जिल्ह्यातील पदाधिकाऱ्यांची बैठक घेण्यात आली. जे पदाधिकारी मुंबईत उपस्थित नव्हते, ते झूम च्या माध्यमातून सहभागी झाले होते.

यावेळी जळगाव व रावेर लोकसभेबाबत चर्चा झाली आहे. महाविकास आघाडीचे लवकरच जागा वाटप होणार आहे. त्यात दोन्ही लोकसभा मतदार संघ राष्ट्रवादीकडेच घेण्यात यावे, असा आग्रह सर्वच पदाधिकाऱ्यांनी केला. त्यांनी मागील लोकसभेच्याबाबतची माहितीही दिली.

तसेच जिल्ह्यातील दोन्ही मतदार संघाची स्थितीचीही माहिती दिली, रावेर लोकसभा मतदार संघ प्राधान्याने राष्ट्रवादी काँग्रेसकडेच असावा, असा आग्रह जिल्ह्यातील पदाधिकाऱ्यांनी केला.

मुंबई येथील बैठकीस ज्येष्ठ नेते एकनाथराव खडसे, राष्ट्रवादी महिला आघाडी प्रदेश अध्यक्ष रोहिणीताई खडसे खेवलकर, जिल्हा अध्यक्ष ॲड. रवींद्र पाटील, माजी मंत्री गुलाबराव देवकर , महानगर जिल्हाध्यक्ष अशोक लाडवंजारी, माजी आमदार दिलीप सोनवणे, उमेश पाटील, रिंकू चौधरी इतर पदाधिकारी कार्यकर्ते उपस्थित होते.

झुममिटींगद्वारे माजी मंत्री अरुणभाई गुजराथी, डॉ. सतीश पाटील, दिलीप वाघ, राजीव देशमुख, संतोष पाटील, डॉ. सुरेश पाटील, तिलोत्तमा पाटील, रिताताई बाविस्कर आदी उपस्थित होते.