जळगाव : शिरसोली (ता. जळगाव) येथून ट्रॅक्टरची ट्रॉली चोरी केल्याप्रकरणी एमआयडीसी पोलिसांनी अट्टल संशयित इमरान ऊर्फ फुन्ना खान हयात खान (वय ३२, रा. मिठी खाडी, आव्हाणे) याला अटक केली आहे. (Tractor trolley thief arrested jalgaon Latest Crime News)

शिरसोली प्र. बो. येथील निजामोद्दीन शमाशोद्दीन पिंजारी यांच्या ट्रॅक्टरची ट्रॉली २४ जानेवारी २०२१ ला मध्यरात्री चोरट्यांनी चोरून नेली होती. याबाबत एमआयडीसी पोलिसांत गुन्हा दाखल झाला होता.

पोलिसांनी सागर ऊर्फ गोल्या रमेश मोरे व आकाश ज्ञानेश्वर शिंदे (दोन्ही रा. आव्हाणे) यांना यापूर्वीच अटक केली असून, त्यांचा साथीदार इमरान ऊर्फ फुन्ना खान हयात खान फरारी झाला होता.

तो गावात आल्याची माहिती निरीक्षक प्रताप शिकारे यांना मिळाली. त्यावरून त्यांच्या पथकातील अतुल वंजारी, मुदस्सर काझी, इम्रान सय्यद, सुधीर साळवे, चंद्रकांत पाटील, सचिन पाटील आदींनी इमरानला सापळा रचून अटक केली.