Jalgaon Police Transfer : जिल्हा पोलिस दलातील १५ सहाय्यक पोलिस निरीक्षक व १५ उपनिरीक्षक, अशा एकूण ३० पोलिस अधिकाऱ्यांच्या बदल्यांचे आदेश जिल्हा पोलिस अधीक्षक एम. राजकुमार यांनी काढलेत.

सोबतच बदली झालेल्या पोलिस उपनिरीक्षकांना नवीन पदाचा पदभार तत्काळ घेण्याचे निर्देशदेखील देण्यात आले आहेत. (Transfers of police officers in district jalgaon news)

जिल्हा पोलिस दलात सहाय्यक निरीक्षक, उपनिरीक्षकांच्या बदल्यांची प्रतीक्षा होती. महाराष्ट्र पोलिस अधिनियमानुसार सक्षम प्राधिकारी म्हणून जिल्हास्तरावरील पोलिस आस्थापना मंडळ यांना प्रदान असलेल्या अधिकाराचा वापर करून पोलिस अधीक्षक एम. राजकुमार यांनी आदेश काढले आहेत.

यात विनंती बदली, नव्याने हजर झालेल्या सहाय्यक पोलिस निरीक्षक आणि पोलिस उपनिरीक्षकांच्या नवीन नेमणुका, प्रशासकीय बदलीबाबत सर्व बाबींचा विचार करून पोलिस प्रशासनाकडून सोमवारी (ता. २१) रात्री उशिरापर्यंत आदेश काढण्यात आले.

हेही वाचा : Credit Card फसवणूक....काय घ्याल काळजी?

दरम्यान, पोलिस दलातील बदलीपात्र कर्मचाऱ्यांचे नुकतेच बदली गॅझेट प्रसिद्ध झाले आहे.

या बदली गॅझेटपूर्वी झालेल्या मुलाखतीत ठरल्याप्रमाणे पोलिस ठाणे न मिळालेले कर्मचारी आणि विविध कारणास्तव विनंती बदल्यांसाठी अर्ज केलेले कर्मचारी, बदल्या होऊनही अधिकाऱ्यांनी न सोडलेल्या कर्मचाऱ्यांना वरिष्ठांच्या आदेशाची प्रतीक्षा लागून आहे.