एरंडोल (जि. जळगाव) : येथील राष्ट्रीय महामार्गालगत असलेल्या पाटचारीच्या खालच्या भागात सापडलेल्या अनोळखी मृतदेहाची ओळख पोलिसांनी काही तासातच पटवून मृतदेह नातेवाइकांच्या ताब्यात दिला. (Latest Marathi News)

राष्ट्रीय महामार्गावर असलेल्या हॉटेल राजलक्ष्मीजवळील पाटचारीत अज्ञात व्यक्तीचा मृतदेह असल्याची माहिती मंगळवारी (ता. २६) सकाळी नऊला पोलिसांना मिळाली. सहाय्यक पोलिस निरीक्षक गणेश अहिरे, पोलिस उपनिरीक्षक शरद बागल, हवालदार अनिल पाटील, काशिनाथ पाटील यांनी घटनास्थळी जाऊन क्रेनच्या साहाय्याने पाटचारीच्या खोल भागातून मृतदेह बाहेर काढून ग्रामीण रुग्णालयात आणला. पोलिसांनी वेगाने तपासचक्रे फिरवून केवळ पाच तासांत मृताची ओळख पटवली. हा तरुण जळगाव येथील सम्राटनगरमधील कैलास ओंकार माळी (वय ३५) असून दुपारी तीनला मृतदेह नातेवाइकांच्या ताब्यात देण्यात आला. पोलिस ठाण्यात आकस्मिक मृत्यूची नोंद करण्यात आली आहे.