चाळीसगाव (जि. जळगाव) : कन्नड घाटात झालेल्या भीषण अपघातात महिला जागीच ठार झाल्याची धक्कादायक घटना शनिवारी (ता. ४) सायंकाळी ५ वाजेच्या सुमारास घडली. याप्रकरणी चाळीसगाव ग्रामीण पोलिस स्थानकात अकस्मात मृत्यूची नोंद करण्यात आली आहे.

याबाबत सविस्तर वृत्त असे की, चाळीसगावहून कन्नडकडे जाणाऱ्या एका दुचाकीला कन्नड घाटात सायंकाळच्या सुमारास भीषण अपघात झाला. या अपघातात सविता देवचंद राठोड (वय-३३ रा. सितानाईक तांडा कोलवाडी ता. कन्नड) या विवाहितेच्या डोक्याला गंभीर दुखापत झाली, यातच तिचा दुदैवी मृत्यू झाला. या घटनेने परिसरात एकच खळबळ उडाली आहे. दरम्यान घटनेची माहिती मिळताच महामार्ग पोलिसांनी घटनास्थळी धाव घेऊन पाहणी केली. व मृतदेहाला ग्रामीण रुग्णालयात दाखल करण्यात आले. चाळीसगाव ग्रामीण पोलीस स्थानकात अकस्मात मृत्यूची नोंद करण्यात आली आहे. पोलिस निरीक्षक संजय ठेंगे यांच्या निर्देशानुसार पुढील तपास पोना भगवान माळी हे करीत आहे.