जळगाव : वीजखांबावर दिवा दुरुस्तीसाठी चढलेला तरुणाचा तोल जाऊन कोसळल्याची घटना २७ सप्टेंबरला घडली होती. या तरुणावर खासगी रुग्णालयात उपचार सुरू असताना त्याचा मंगळवारी (ता. ४) दुपारी मृत्यू झाला.

चंद्रकांत दत्तात्रय ठाकरे (वय २३, रा. मोहाडी) असे मृत तरुणाचे नाव आहे. मोहाडी (ता. जळगाव) येथे चंद्रकांत ठाकरे हा तरुण कुटुंबीयांसह वास्तव्यास होता. तो ग्रामपंचायतीत पाणीपुरवठा विभागात कामाला होता.(young boy death by falling from electricity poll jalgaon news)

गावातील विजेच्या खांबावरील दिवा बंद असल्याने चंद्रकांत तो दुरुस्त करण्यासाठी खांबावर चढला होता. दुरुस्ती करताना तोल गेल्याने तो जमिनीवर कोसळला. डोक्याला गंभीर दुखापत झाल्याने त्याला तत्काळ खासगी रुग्णालयात दाखल केले.

येथे चार दिवसांपासून त्याच्यावर उपचार सुरू होते. चंद्रकांत अविवाहित असून, त्याच्या मागे आई, वडील, दोन बहिणी असा परिवार आहे. या प्रकरणी एमआयडीसी पोलिस ठाण्यात आकस्मिक मृत्यूची नोंद झाली आहे.