सिंधुदुर्गनगरी : जिल्हा परिषद आरोग्य (Zilla Parishad Health) विभागामार्फत जिल्ह्यातील १५ ते १८ वयोगटातील ४० हजार विद्यार्थ्यांना आजपासून कोरोना प्रतिबंधक (covacin) लसीकरण करण्यात येणार आहे. त्याबाबत नियोजन केले असल्याची माहिती जिल्हा आरोग्य अधिकारी डॉ. महेश खलिपे (Dr. Mahesh Khalipe) यांनी आज दिली.

केंद्र व राज्याच्या सूचनेनुसार आजपासून १५ ते १८ वयोगटातील नागरिकांना कोरोना प्रतिबंधक लसीकरण करण्यात येणार आहे. या लसीकरणासाठी (Vaccination) कोव्ह्यक्सिन लसचा वापर केला जाणार आहे. ज्यांचा जन्म २००७ पूर्वी झाला आहे, त्यांना लस दिली जाणार आहे. त्यासाठी आवश्यक असलेली लस उपलब्ध आहे.

जिल्ह्यात ४० हजार लस उपलब्ध आहे. या लासिकरणासाठी शिक्षण व आरोग्य विभागाने नियोजन केले आहे. शिक्षण विभागाने १५ ते १८ वयोगटातील विद्यार्थ्यांची यादी तयार करून त्या सर्व विद्यार्थ्यांना लसीकरणासाठी प्रवृत्त करावे तसेच इंटरनेट सुविधा, डाटा ऑपरेटर आणि कक्ष उपलब्ध करून द्यावा तर आरोग्य विभागाकडून लस, लसीकरणसाठी लागणारे साहित्य व मनुष्यबळ पुरविण्यात येणार आहे.

जिल्ह्यात सुमारे ४० हजार विद्यार्थी आहेत. लसिकरणात कोणताही व्यत्यय न आल्यास १५ दिवसात सर्व १५ ते १८ वयोगटातील विद्यार्थ्याचे लसीकरण पूर्ण केले जाईल. आजच्या पहिल्या दिवशी जिल्ह्यात आठ ठिकाणी लसीकरण सुरु आहे. उद्यापासून (ता.४) सर्व प्राथमिक आरोग्य केंद्र कार्यक्षेत्रातील शाळा, महाविद्यालयांमध्ये लसीकरण होणार आहे. सर्व विद्यार्थ्यांनी लसीकरणाचा लाभ घ्यावा व कोविड आजारापासून संरक्षित व्हावे, असे आवाहन जिल्हा आरोग्य अधिकारी डॉ. खलीपे यांनी केले आहे.