मुरूड : जूनमध्ये आलेल्या चक्रीवादळात मुरूड आगारातील नियंत्रण कक्षासह अन्य कक्षांचे छप्पर उडून गेले आहे. मात्र, पाच महिने उलटले तरी येथील छप्पर बसवण्यात आलेले नाही. याशिवाय, येथील भिंतींना तडे गेल्याने कक्षाची दुर्दशा झाली आहे. सध्या अनलॉकनंतर आगारातून शिर्डी, धुळे, औरंगाबाद, नाशिक, पुणे आदी लांब पल्ल्याच्या एसटी बसेस सुरू केल्या आहेत. त्याला प्रवाशांकडून चांगला प्रतिसादही मिळत आहे. असे असताना शेडची तातडीने दुरुस्ती व्हावी, अशी मागणी प्रवाशांकडून होत आहे.

सविस्तर वाचा : BMC कर्मचायांसाठी गोड बातमी! महापौरांनी जाहीर केला दिवाळी बोनस

मुरूड आगारातून लवकरच 100 टक्के फेऱ्या सुरू होतील, अशी स्थिती निर्माण झाली आहे. याशिवाय मुरूड हे पर्यटनस्थळ असल्याने येथे पर्यटकांची संख्याही अधिक असते. सध्या अनेक जिल्ह्यांसाठी एसटीच्या फेऱ्या सुरू केल्या आहेत. मात्र, जूनच्या चक्रीवादळात आगारातील नियंत्रण कक्षासह अन्य विभागांतील कक्षांचे छप्पर उडून गेल्याने दुर्दशा झाली आहे. पाच महिने झाले तरी छप्पर वा दुरुस्ती करण्यात आली नाही. नियंत्रण कक्षातील भिंतीचे प्लास्टर निघाले असून, तडेही गेले आहेत. तर काही अनेक ठिकाणी गळतीही सुरू झाली होती. परिणामी, दुर्घटना घडण्याची भीती कर्मचाऱ्यांमध्ये निर्माण झाली आहे.

वाचा हेही : नवी मुंबई आयुक्त निवासाला आग! शॉर्टसर्किटमुळे आग लागल्याचा अंदाज

यासाठी पाच महिन्यांपासून बंद प्रवासी बैठकीसाठी केलेल्या शेडमधूनच येथील कर्मचाऱ्यांना कारभार करावा लागत आहे. त्यामुळे येथील कक्षाची दुरुस्ती तातडीने करावी, अशी मागणी होत आहे. याशिवाय, आगारातील प्रवेशद्वारासमोरच झालेले खड्डे बुजवण्याची आवश्‍यकता आहे. याविषयी प्रवासी संघटनेचे मुरूड तालुकाध्यक्ष श्रीकांत सुर्वे लवकरच दुरुस्तीसंदर्भात आगारप्रमुखांना निवेदन देणार आहेत. 

सविस्तर वाचा : खोपोलीकर लोकलच्या प्रतीक्षेत! सात महिन्यांपासून नागरिकांची गैरसोय; मोठा आर्थिक फटका

मध्यवर्ती कार्यालयाकडे दुरुस्तीचा प्रस्ताव पाठवला आहे. निविदा प्रक्रिया या कार्यालयातूनच निघत असल्याने वरिष्ठांकडे पाठपुरावा सुरू आहे. 
- सनील वाघचौरे, आगार व्यवस्थापक, मुरूड  

(संपादन : उमा शिंदे)