राजापूर (रत्नागिरी)  : उन्हाळे तीर्थक्षेत्री गंगामाईच्या झालेल्या आगमनाची बातमी भाविकांसाठी आनंद देणारी असली तरी, कोरोनाचे संक्रमण होवू नये या अनुषंगाने खबरदारी म्हणून गंगातीर्थक्षेत्र बंद करण्यात आल्याची माहिती गंगा देवस्थानचे श्रीकांत घुगरे यांनी दिली. त्यामुळे गंगामाईचे आगमन होवूनही लॉकडाऊनमुळे भाविकांना पवित्र गंगास्नान करता येणार नाही.

विज्ञानालाही कोडे पडलेल्या गंगामाईचे तब्बल नऊ महिन्यांच्या कालावधीनंतर उन्हाळे येथील तीर्थक्षेत्री आगमन झाले. गेल्या काही दिवसांमध्ये हवेतील कमालीचा उष्मा वाढला असून त्यातून जीवाची काहीली होत आहे. त्यातच, वाढत्या उष्म्म्याचा नैसर्गिक जलस्त्रोतांवर प्रतिकूल परिणाम होवून पाणीटंचाई जाणवू लागली आहे. अशा स्थितीमध्ये गंगामाईचे आगमन झाले आहे. चौदा कुंडांसह मूळ गंगा, काशिकुंड आणि गायमूखाच्या येथे चांगल्या प्रकारे गंगामाई प्रवाहीत आहेत. गंगामाई तीर्थक्षेत्रीच्या पवित्र स्नानाला विशेष स्थान असल्याने गंगामाईच्या वास्तव्याच्या काळामध्ये राज्यासह-परराज्यातून मोठ्यासंख्येने भाविक पवित्र स्नानासाठी येतात. त्यामुळे गंगामाईचे आज झालेले आगमन भाविकांसाठी पवित्र स्नानाची पर्वणी ठरणार आहे.

हेही वाचा- दिलासादायक -  त्या तिघांचे कोरोना अहवाल निगेटिव्ह...
कोरोना विषाणूचे संक्रमण होवू नये म्हणून देशभर लॉकडाऊन आणि संचारबंदी जारी करण्यात आली आहे. अशा स्थितीत गंगातीर्थक्षेत्री भाविकांनी पवित्र स्नानासाठी गर्दी केल्यास त्याच्या कोराना संसर्ग होण्याची शक्यता नाकारता येत नाही. त्यामुळे खबरदारी म्हणून गंगातीर्थक्षेत्र बंद ठेवण्यात आल्याची माहिती श्री. घुगरे यांनी दिली.    

हेही वाचा-  लाॅकडाऊनची एैसी की तैसी म्हणत नागरीक बाजारात अन्....

गंगाक्षेत्र हे पर्यटन स्थळ असल्याने त्याठिकाणी पवित्र स्नानासाठी वेगवेगळ्या भागातील भाविक मोठसंख्येने येण्याची शक्यता आहे. त्यातून कोरोना विषाणूचे संक्रमण होण्याची शक्यता आहे. त्यामुळे जिल्हाधिकारी यांच्या आदेशानुसार तहसीलदार प्रतिभा वराळे यांनी कोरोनाचे संक्रमण रोखण्यासाठी गंगाक्षेत्रामध्ये भाविकांनी जाऊ नये यादृष्टीने प्रतिबंध करणारा आदेश  प्रशासनाला लेखी पत्राद्वारे दिला आहे. हे पत्र त्यांनी पोलिस प्रशासन, स्थानिक ग्रामपंचायत प्रशासन याना दिले आहे.